காகுத்தன் -(காகுத்தன் மரபில் தோன்றிய) இராமபிரான்; கண்டுவரும்
- (அனுமன்) சீதையைப் பார்த்து வருவான்;  என்று இருக்கும் -  என்று
எண்ணியிருப்பான்; கவிகுலக்கோன் - குரங்குகளின் தலைவன் (சுக்கிரீவன்);
கொண்டுவரும் - (அனுமன்) சீதையைக் கொண்டு வருவான்; என்று
இருக்கும் - என்று எண்ணியிருப்பான்; யான் -  அற்பனாகிய யான்;
இழைத்த - நிறைவேற்றிய; கோள் இது - இலட்சியமோ இப்படியுள்ளது;
புண்டரிக நயனத்தான்பால் - தாமரைக் கண்ணன் (இராமன்) பால்; இனி -
இனிமேல்;  யான் போவேனோ - யான் செல்வேனோ; விண்டவரோடு -
பகைத்தவர்களுடன்; உடன் வீயாது -  ஒருங்கே சாகாமல்; யான் வாளா -
யான் பயனின்றி; விளிவேனோ -  இறப்பேனோ.

     விண்டவர்என்பதற்கு, அங்கதன் முதலானவர்கள் என்று பொருள்
கூறுவாரும் உளர். அங்கதன் முதலானவர்கள் இறவாமையால் அவ்வுரை
வெவ்வுரை. போரில் இறப்பாரை வீரர் விரும்புவர் என்க - மந்திரப்படலம்
தசரதன் மொழிகளைப் பார்க்கவும்.

     இந்தச்சத்துருவான அரக்கரைக் கொல்லாமல் வெறுமே சாகேன்
என்பது பழையவுரை (அடை -பதி).                            (227)