மூலம்
	உரை   1. உஞ்சைக்காண்டம்   36. சாங்கித்தாயுரை                  245   கற்றோர் மொய்த்த முற்றவை நடுவண்            தாழாப் பெரும்புகழ்க் காளக் கடவுண்முன்            பாலக னென்னும் பண்ணவர் படிவத்துக்            காள சமணன் காட்சி நிறுப்ப            ஐம்பெருஞ் சமயமு மறந்தோற் றனவென      250   வேந்தவ ணுதலிய வேதா சிரியரும்            தாந்தம் மருங்கிற் றாழங் காட்டிச்            சாங்கிய சமயந் தாங்கிய பின்னர்            நல்வினை நுனித்தோ னம்மொடு வாழ்கெனப்            பல்வேல் வேந்தன் பரிவுசெய் தொழுகலின்                     (இதுவுமது)               245 - 254 : கற்றோர்..........ஒழுகலின்   (பொழிப்புரை) கற்றுவல்ல சான்றோர் குழுமிய நல்லவை நடுவண் சென்று மன்னன் முன்னிலையில் தாழ்ச்சியில்லாத பெரிய புகழையுடைய காளமுனிவன் தலைமையில் எங்குழு வினனாகிய பாலகன் என்னும் இயற்பெயரையுடையவனும், தவப்படிவம் மேற்கொண்டவனுமாகிய காளசமணன் என்னும் சமயக் கணக்கன், பிற சமயத்தாரை யெல்லாம் சொற்போரில் வென்று தனது சமய மெய்க்காட்சியை நிலை நிறுத்தினனாக, ஏனை ஐவகைச் சமயமும் அறத்தாற் றோல்வியுற்றன, என்று வேந்தன் கருதுதற்குக் காரணமாய் வைதிக சமயத்து ஆசிரியன்மாரும், தாம் தாம் மேற்கொண்ட சமயத்தின்பால் தாழ்வுடைமை காட்டி ஆண்டு நிலை நாட்டப்பட்ட சாங்கிய மதத்தையே மேற்கொள்வாராக; ஆயபின்னர் நல்லறத்தை நுனித்துணர்ந்து நிலை நாட்டிய சான்றோன் நம் மரண்மனைக்கண் எமக்கு ஆக்கமாக எம்மோடு உறைவானாக என்று பலவாகிய வேற்படையையுடைய பிரச்சோதன மன்னன் அன்பு செய்து ஒழுகுதலாலே என்க.   (விளக்கம்) முற்றவை - நல்லவைக்குரிய இலக்கணமெல்லாம் நிரம்பிய அவை. காளக்கடவுள் - காளமுனிவன். வேதாசிரியர் - வைதிக சமயக்கணக்கர்.