நீர் பாய்தற்கு ஒருத்தி ஞாழற் சினையிலே ஏறிநின்றாளாக அப்பொழுது அச்சினையை அவள் தோழியர் அசைத்தனர் என்பது கருத்து. அசைத்தலாலே நிலைகொள்ளமாட்டாமல் பாய்ந்தாள் என்க.

    சிகழிகை - மயிர்முடி. பின் - பின்னல், சடை. புறம்பு - முதுகு. பொன்னரிமாலை புடைத்தலைத் தன்கணவன் தன் கூந்தலைப் பற்றுவானாகக் கருதி என்க. தான் ஊடியிருப்பவும் ஊடல் தீர்த்தலின்றித் தனது சினமாகிய கதவைத் தனது வன்கண்மையால் உடைத்தெறிந்து தன்னைப் பண்பின்றித் தீண்டுகின்றான் என்று கருதிச் சினந்து என்றவாறு.

    ஊடியிருத்தலால் கடைக்கண்ணால் நோக்கினள். அன்மையின் - ஆங்குக் கணவனில்லாமையாலே, செற்றப்புதவு - சினமாகிய கதவு. குத்திவாங்கி என்றது - இனிதே பேசி ஊடலுணர்த்தாமல் வலிந்து தீண்டுகின்றான் என்றபடியாம்.