தயரதன் கோசலைபால் ‘இராமன் வருவானா’ எனக் கேட்டு வருந்தல் | 1675. | என்று என்று, அரசன் மெய்யும்,
இரு தாள் இணையும், முகனும்,
தன்தன் செய்ய கையால்
தைவந்திடு கோசலையை,
ஒன்றும் தெரியா மம்மர்
உள்ளத்து அரசன், மெள்ள,
‘வன் திண் சிலை நம் குரிசில்
வருமே? வருமே?’ என்றான். |
என்று என்று - என இவ்வாறு கூறி; அரசன் மெய்யும் -
அரசனது உடம்பையும்; இருதாள் இணையும் முகனும் தன்தன் செய்ய
கையால் தைவந்திடு கோசலையை -இரண்டு அடிகளையும் முகத்தையும்
தன்னுடைய சிவந்த கைகளால் தடவிக் கொடுக்கின்ற கோசலையைப்பார்த்து;
ஒன்றும் தெரியா மம்மர் உள்ளத்து அரசன் - ஒரு செய்தியும் அறியாது
மயங்கிய மனம் உடைய தசரதன்; மெள்ள - மெதுவாக; ‘வன் திண் சிலை
நம் குரிசில்வருமே? வருமே? - வலிய கட்டமைந்த வில்லை உடைய
நம்முடைய இராமன் வருவானா, வருவானா;’ என்றான்-. தன்தன் எதுகை நோக்கிய அடுக்கு. ‘வருமே வருமே’ அடுக்கு. 70 |