துவசங்களையுடைய பகைவர்களை, தனி தனி ஓட்டி - தனித்தனியாக ஓடும்படி
செய்து, நிரைஉம் - பசுக்களையும், பெயர்த்து நல்குவேன் -
(அவர்களிடத்தினின்று) மீட்டுக்கொடுப்பேன்,' என்று உரைத்தனள் - என்று
சொன்னாள்; (எ - று.)

     உத்தரனுக்குச் சைத்தியோபசாரஞ் செய்து தேற்றி, பேடிவடிவான
அருச்சுனன் தான் பகைவென்று ஆநிரைகளை மீட்டுத்தருவேனெனக்
கூறினனென்க.  பீஷ்மருக்குப் பனைக்கொடியும், துரோணருக்கு
வேதக்கொடியும், அசுவத்தாமனுக்கு அன்னக்கொடியும், கர்ணனுக்குக்
கச்சைக்கொடியும், துரியோதனனுக்குப் பாம்புக்கொடியும் முதலாக அனைத்தும்
அடங்க, 'பல்கொடி' என்றாள்.  வெயர்த்தல் - புழுங்குதல்; இது - இங்கே,
அச்சத்தின் மெய்ப்பாடு.  பனிநீர் - ஒருவகை வாசனை நீர்.  'தனித்தனி ஓட்டி'
என்றது - இருவர் ஒருவழிச்செல்லாதவாறு சிதறடித்தென்றபடி.           (199)

41.-உத்தரன் குதித்தோட, பிருகந்நளை
அவனைப்பிடித்துவந்து தேர்க்காலிற் கட்டுதல்.     

      (இ -ள்.) (அது கேட்டும் உத்தரன் அச்சந்தெளியாமல்), கொடி தட
தனிதேரினின்று - துவசத்தையுடைய பெரிய ஒன்றாகிய [ஒப்பற்ற] தேரினின்று,
உகைத்து - எழும்பி, முன் குதியா - முன்னே குதித்து, அடி தலம் பிடர்
அடித்திட ஓடலும் - பாதங்கள் பின்புறத்திலே அடிக்கும்படி (அதிவேகமாக)
ஓடிப்போன வளவில்,- (அருச்சுனன்), ஒரு நொடியினில் - ஒரு
கணப்பொழுதிலே, அவனை - அவ்வுத்தரனை, தொடர்ந்து போய் -
பின்தொடர்ந்து ஓடிச் சென்று, தொடி தட புயம் இரண்டையும் -
தொடியென்னும் வளையணிந்த (அவனது) பெரிய தோள்களிரண்டையும்,
துவக்கி - கட்டி, பிடித்து வந்து - பிடித்துக்கொண்டு வந்து, தேருடன்
பிணித்தான் - தேரோடு கட்டினான்; (எ - று.)

     "தேர்விடும் விசயனுக்கிவள்" (31) என்றும், "உரைத்தனள் பேடி" (40)
என்றும் பேடிவடிவிற்கு ஏற்பப் பெண்பாலாற் கூறி வந்தவர், இனி ஆண்மை
காட்டத் தொடங்கியதனால், ஆண்பாலாற் கூறலாயினர்.  உகைத்தல் -
அழுத்தியெழுதல்.  'அடித்தலம் பிடரடித்திட' என்றது-அவன் ஓடின
ஓட்டத்தின் வேகமிகுதி கூறியவாறு:  தன்மைநவிற்சியணி.       (200)

42.-பிருகந்நளை தேர்செலுத்தி, முன்பு தான் வைத்த வில்லையும்
அம்பையும் எடுத்துவருதல்.