பூர்ணகர்ப்பம்.  வாலெடுத்துத்துள்ளிக் குதித்தோடுதல் - கொண்டாட்டமிகுதி
பற்றி; இது-பசுக்களின் இயல்பு.  இச்செய்யுள் - பசுக்களின் தன்மையை
வருணித்ததனால், தன்மைநவிற்சியணி.                         (216)

58.-சாபம்நீங்க, அருச்சுனன்தனது தேரினையும்
அநுமத்துவசத்தையும் பெறுதல்.

     அக்கினிதேவனளித்த தேரையும் அநுமக் கொடியையும் அருச்சுனன்
எதிரில் வரப்பெற்றா னென்றபடி.  குறித்தல்-மனத்தில் நினைத்தல்.
அவண்=அவ்வண்ணம்:  ராஜபரிவாரங்களைத் துரத்திப்பொருது நிரைமீட்டதி
லென்றபடி.  கடைசிவத்தல் - நல்லிலக்கணமாகிய சிலசிவந்த இரேகைகளைக்
கடையிடத்துப்பெறல்.  குரங்குக்கொடியும், நான்கு வெள்ளைக்குதிரைகள்
பூட்டிய தேரும், காண்டீவமென்னும் வில்லும், அட்சயதூணீரமும் -
காண்டவதகனகாலத்து அக்கினிதேவனால் அருச்சுனனுக்கு அளிக்கப்பட்டவை.
பின்பு வீமசேனன் புஷ்பயாத்திரையாக அளகாபுரிக்குச் சென்றபொழுது
இடைவழியிற் கதலிவனத்திலே தவஞ்செய்துகொண்டிருந்தவனும்,
வாயுகுமாரனாதலால் தனக்குத் தமையனுமான அநுமானைக்கண்டு வணங்கி
வேண்டிப் போர்க்களத்தில் அருச்சுனனது தேர்த்துவசத்தில் வந்து நின்று
மகிழ்ந்து கூத்தாடும்படி வரம்பெற்றதனால், 'கொடியின் மீதெழு மனுமன்'
என்றார்.  அநுமந் - ஹநுமாந் என்ற வடசொல்லின் விகாரம்;
(குழந்தைப்பருவத்திலே இளஞ்சூரியனைக் கனிந்த பழமென்று கருதிப் பிடிக்கப்
பாய்ந்தபொழுது அதனையறிந்து சினந்து இந்திரனால் வச்சிராயுதங்கொண்டு
அடிக்கப்பட்டுச் சிதைந்த) கன்னமுடையனாதலால், இப்பெயர் வாய்த்தது;
கன்னத்தில் விசேஷமுடையவ னென்க; ஹநு - கன்னம், மாந்-வடமொழிப்