மிக்காள். தனக்கு ஒப்பில்லாத இல்லறவாழ்க்கையிலிருந்து செய்யுந்தவத்திற்
சிறந்தவளான அவள், நின் நேயம் என்றுஉம் பிரியாநலன் நேர்க என்றாள் -
உனதுஅன்பு எந்நாளும் நீங்காமையாகிய நல்லவரத்தை (எனக்கு) உடன்பட்டுத்
தருவாயாக 'என்று (கணவனை வரம்) வேண்டினாள் (எ - று.)

     அவன் மிக்க அன்போடு அவளைக் கொண்டாடி 'நினக்கு வேண்டும் வரம்
வேண்டுவாயாக' என்று சொல்ல, அவள் வேறொருவரத்தையும் வேண்டாமல் 'உன்
அன்பு எப்பொழுதும் நீங்காதாகுக' என்று வேண்டினள் என்பதாம்.      (552)

      (இ-ள்.) (அவன் அங்ஙனம் வரங்கொடுத்தபின்பு), -இருவோர் உம்-
(கணவனும்மனைவியு மாகிய) அவ்விருவரும், 'இதயம் ஒத்து-மனங்கலந்து,
குன்றுஉம் நதிஉம்மரன்உம் பைங்கொடிஉம் ஆகி-மலையும் (அதனைச்சார்ந்து
பெருகுகிற) நதியும்மரமும் (அதன்மேற்படரும்) பசியபூங்கொடியுமாய்,
துன்றும்துணை ஆய் பலயோனிகள் தோறும் எய்தி - இங்ஙனமே இன்றியமையாது)
பொருந்திய துணையாகிப்பலவகையுருவங்களிற் பொருந்தி, நின்றுஉம் சரித்துஉம் -
(ஓரிடத்து) நின்றும்(பலவிடங்களிற்) சஞ்சரித்தும், என்றுஉம் பிரியாது -
எப்பொழுதும் (ஒருவரையொருவர்) பிரியாமல், நெடிது - நெடுங்காலம், அரு
போகம்-அரிய இன்பத்தை,துய்த்தார் - அனுபவித்தார்கள் (எ - று.)

     அவன் குன்றாக வடிவுகொள்ள இவள் நதியாகவடிவுகொண்டு அதனைச்
சார்ந்தும், அவன் மரவடிவுகொள்ள இவள் கொடிவடிவு கொண்டு அதனைத்
தழுவியும், இவ்வாறு பற்பல யோனிபேதங்களிற் புக்கு அவ்விருவரும் சுகானுபவஞ்
செய்தன ரென்க.                                               (553)

     (இ-ள்.) இந்த பிறப்பில் - (நாளாயணயாகிய) இந்தச்சன்மத்திலே, நலம்
எய்தி-(இப்படிப் பலவாறு) இன்பத்தை அனுபவித்து, இறந்த பின்னும்-, இவள்-,
சிந்தித்தவண்ணம்-நினைத்தபடியே, இந்திரசேனை ஆகி-(அடுத்தபிறப்பில்)
இந்திரசேனை யென்பவளாய், அந்த பதியை அடைந்தாள் -(முன்பிறப்பிற்
கணவனான) அந்த மௌத்கலியனையே அடுத்தாள்; (அப்பொழுது) அவனும்-,
அஞ்சி- (முத்திப்பேரின்பத்தில் விருப்பத்தால் இவளைச்சேர்ந்து சிற்றின்பம்
நுகர்தற்குப்) பயந்து, வந்தித்த தொல்லை அரு மா தவம் மன்னி நின்றான்-
(கடவுளை)வணங்கிச் செய்கிற தொன்றுதொட்டு வருகிற அரியபெரிய
தவவொழுக்கத்திற்பொருந்திநின்றான்; (எ- று.) மற்று - வினைமாற்று.