136.-இருவரும் செய்தபோர்த்திறம். வேலி னால்வடி வாளி னால்வரிவில்லி னாலுரை பெற்றவெங்
கோலி னாலிரு வருமு னைந்திருகுன்ற மொத்தன தேரினார்
மாலி னால்வரு மத்த யானைகண்மலைவ தொத்தும தித்தபோர்
நூலி னால்வழு வறம லைந்தனர்நுண்மை யாவினுநுண்ணியார். |
(இ -ள்.) நுண்மை யாவின்உம் நுண்ணியார் இருவர்உம் - நுண்ணிய
பொருள்க ளெல்லாவற்றினும் நுண்ணிய தமது அறிவு நுட்பத்தை
யுடையவர்களான கண்ணனும் சிசுபாலனுமாகிய இருவரும்,-இரு குன்றம் ஒத்தன
தேரினார் - இரண்டு மலைகளைப் போன்றனவான தேர்களின்
மேலிருந்தவர்களாய்,- வேலினால் - வேலாயுதத்தைக் கொண்டும்,
வடிவாளினால் - கூரிய வாளாயுதத்தைக்கொண்டும், வரி வில்லினால்
உரைபெற்றவெம் கோலினால் - கட்டமைந்த வில்லினா லெய்யப்படுகிற
புகழ்பெற்ற கொடிய அம்புகளைக்கொண்டும், மாலினால் வரு மத்த யானைகள்
மலைவது ஒத்து - மயக்கத்துடனே வருகிற மதங்கொண்ட யானைகளிரண்டு
தம்மிற் போர் செய்வது போன்று, மதித்த போர் நூலினால் வழுஅற - நன்கு
மதிக்கப்பட்ட யுத்த சாஸ்திரமுறைப்படி தவறாமல், முனைந்து மலைந்தனர் -
ஊக்கங்கொண்டு போர்செய்தார்கள்; நுண்மையாவினும் நுண்ணியார் - நுண்ணிய பொருள்களனைத்தையும்
நுட்பமாக உணரும் அதிசூக்ஷ்மபுத்தியுடையோர். நுண்மை-பண்பாகுபெயராய்,
நுண்ணியபொருளின்மேல் நின்றது. 'நுண்ணியார்' என்றவிடத்து, அறிவினது
நுண்மை அதனையுடையார்மே லேற்றிக் கூறப்பட்டது, வடிவாள் -
வடிக்கப்பட்ட வாள்; வடித்தல் - நெருப்பிற் காய்ச்சியடித்துக் கூராக்குதல்:
தேர்ந்தெடுக்கப்பட்ட வாள் எனினுமாம். தேர்க்குக் குன்றம் - வலிமை பருமை
உயர்வுகளில் உவமம். தேரினார் - குறிப்பு முற்றெச்சம். 'குன்றமொத்துயர்
தேரினார்' என்பதும் பாடம். 'மாலினால்' என்றதில் 'ஆல்' என்ற மூன்றனுருபு
அடைமொழிப்பொருளது. உரை பெற்ற - சிறந்ததென்று கொண்டாடப்பெற்ற.
(136) வேறு. 137.-இருவரும் சிலநேரம்சமமாகப் பொருதபின்பு, கண்ணன்
சிசுபாலன்மேல் தனது சக்கராயுதத்தைப் பிரயோகித்தல். வெஞ்சின முடுக வொருவருக்கொருவர் வெல்லலுந்
தோற்றலுமின்றி,
வஞ்சின முரைசெய் துள்ளமு மெய்யும் வாகுபூதரங்களும் பூரித்,
தெஞ்சினர் தமைப்போ லிளைத்தபி னினிவானேற்றுதல்
கடனெனக் கருதிக்,
கஞ்சனை முனிந்தோ னிவன்முடித்தலைமேற்கதிர்மணித்
திகிரியே வினனே. |
(இ-ள்.) வெம் சினம் முடுக - கடுங்கோபம் மேல்மேல் மூள,
ஒருவருக்கு ஒருவர் வெல்லல்உம் தோற்றல்உம் இன்றி-ஒருவரை |