யாது' என்று எண்ணித் தான்கொண்ட தொழிலைநெகிழ்த்தி விடப்பகைவரால்
எளிதிற் பிரிக்கப்பட்டு விலகிச்செல்வன்:  ஆகவே, தேறலார்தமைத் தேறலும்,
தேறினர்தமைத் தேறாமையுங் கூடாவென்க;  "தேரான் பிறனைத் தெளிந்தான்
வழிமுறை, தீராவிடும்பைதரும்," "தேரான்தெளிவுந் தெளிந்தான்கணையுறவும்,
தீராவிடும்பைதரும்" என்ற திருக்குறட்பாக்களினால் முதலடியின் கருத்து
விளங்கும்.  இனி, தேறலார்தமைதேறலும் - நம்புதற்குத் தகுதியல்லாத
அயோக்கியர்களை நம்புதலும், தேறினர் தேறலாமையும் - யோக்கியரென்று
கொண்டவர்களை நம்பா தொழிதலும் என்றுமாம்.  'மாறுடன் மருவிவாழ்தல்'
என்பதே இங்குச் சந்தர்ப்பத்துக்கு ஏற்றதாயினும், அதன் இனமாக
மற்றவற்றையும் உடன்கூட்டி யுரைத்தார்.  "நட்புப்பிரித்தல் பகைநட்ட
லொற்றிகழ்தல் பக்கத்தார் யாரையு மையுறுதல் - தக்கார், நெடுமொழி கோறல்
குணம் பிறிதாதல், கெடுவது காட்டுங் குறி" என்ற நீதி நெறிவிளக்கச்செய்யுள்
இங்கு அறியத்தக்கது.

    தேறினர்த் தேறலாமை - உயர்திணையிடத்து இரண்டனுருபு தொக்கு
வலிமிக்கது: "இயல்பின் விகாரம்." மாறு - பகைவர்க்குப் பண்பாகுபெயர்.
என்றுகொண்டு, கொண்டு - அசை. கூறு - முதனிலைத்தொழிற்பெயர்.
'கூறலாதன' - கூறலாகாதன என்பதன் தொகுத்தல் விகாரமுமாம்: கூறலாதன
என்றது - 'வரதனாற் பணிப்புறு தொழில் மறுக்க நாம் யாவர்' எனவும்,
'சூதாட்டம் அறிவுடையோர்செய்கையன்று, பாதகத்தில் ஒன்று' எனவும்,
'விதியினை யாவரே எதிர் வெல்வார்' எனவும் துரியோதனன் பக்கல் செல்ல
வேண்டுவது அவசியமென்பது தோன்றத் தருமன் கூறியவற்றை.    (225)

73.-நகுலசகதேவர்களும்வீமார்ச்சுனர்களின்
விருப்பத்தின்படியே சொல்லத் தருமன் தன் கருத்தை
வெளியிடுதல்.

     (இ -ள்.) இ வகை விசையன் மொழிந்ததும் - இவ்வாறு அருச்சுனன்
கூறியதையும், முந்துறு வீமன் மாற்றமும் - முன்னதாகப் பேசிய
வீமசேனனுடைய வார்த்தையையும், கேட்டு -,-இசை பெறும் பெயர் - புகழ்
பெற்ற பெயரை யுடையவர்களாகிய, நகுலனும்-, தம்பியும் - (அவனது)
தம்பியாகிய சகதேவனும், ஏகுதல் தகாது என்றார் - '(அத்தினாபுரிக்குத்
துரியோதனனது விருப்பத்தின்படியே) போவது தகுதியன்று' என்றே
கூறினார்கள்;  அறம் செய்வான் - (அவற்றைக் கேட்ட) தருமத்தையே
செய்பவனாகிய யுதிஷ்டிரன், 'வசை அறும் புகழ் துணைவர்