இத்தூதர்கள், பாண்டவர் செய்தியை யுணர்ந்துவருமாறு
துரியோதனாதியரால் அனுப்பப்பட்டுச் சென்றவ ராதலால், இங்கு 'மீண்டவர்'
எனப்பட்டனர். தருமபுத்திரன் முதலியோர் வந்த செய்தியைக் கேள்வியுற்ற
துரியோதனாதியர் 'இனிச் சூதாடி அவரை எளிதில் வென்றுவிடலாம்' என்ற
கருத்தினால் மிக்க மகிழ்ச்சிகொண்டு மயிர்சிலிர்க்கப்பெற்றன ரென்க.
மாண்டவர் - மாட்சிமைப்பட்டவர்; மாண் - பகுதி. (இச்சொல் இறந்தவரென்று
பொருள்படும்போது, மாள் - பகுதியாம்.) புளகம் - மயிர்ச்சிலிர்ப்பு; வடசொல்.
(265) 113.- பாசறையின் சிறப்பு. தேசறை யிடங்களுந்தேங்கொள் கானமும்
மூசறை மதுகர மொய்த்தசோலையும்
வீசறல் வனநதி விதமுமேல்கொளப்
பாசறை யிருந்தவா பகரலாகுமோ. |
(இ -ள்.) தேசு அறை இடங்களும்-ஒளிவீசுகின்ற பளிக்கறையினிடங்களும்,
தேன் கொள் கானமும் - தேனை மிகுதியாகக்கொண்ட காட்டினிடங்களும்,
மூசு அறை மதுகரம் மொய்த்த சோலையும் -நெருங்கிய ஆரவாரிக்கிற
வண்டுகள் மொய்க்கப் பெற்ற பூஞ்சோலைகளும்,வீசு அறல்வனம் நதிவிதமும்
- அலை வீசுகின்ற நீரையுடைய காட்டாறுகளின்வகைகளும், மேல் கொள -
தன்னிடத்துப் பொருந்தும்படி, பாசறை இருந்தஆ(று) - (தருமபுத்திரனது)
அந்தப்படைவீடு இருந்த தன்மை, பகரல் ஆகுமோ- (என்னால் வருணித்துச்)
சொல்லுந் தன்மையுடையதோ? (எ - று.) இது, கவிக்கூற்று. அழகியகாடும் பூஞ்சோலையும் காட்டாறும்
பொருந்தியுள்ள இடத்திலே பளிக்கறைகளையுடைய பாடிவீடுகளை
யமைத்துக்கொண்டு பாண்டவர்கள் உல்லாசமாகத் தங்கியிருந்தன ரென்க.
'தேசு அறை' என்றமையால், 'பளிக்கறை' யென்று கொள்ளப்பட்டது; அன்றி,
மணி பொன் முதலியன நிறைந்திருந்தமைபற்றி, 'தேசறை' என்றாருமாம். தேசு
- தேஜஸ் என்ற வடசொல்லின் சிதைவு. தேன்+கொள்; தேங்கொள்:
தேன்மொழி வலிவர ஈறுபோய் இனமெலிமிக்கது. அறல் - நீர்: நறுமண
லுமாம். ஆ - விகாரம். ஓகாரம் - எதிர்மறை. (266) 114.- சூரியாஸ்தமனம். விருந்துறு சேனைவெவ் வீரரின்னமுது
அருந்தினர் மெய்குளிர்ந்தசைவு தீர்தலும்
வருந்தின ரிவர்துயில்வதிய வேண்டுமென்று
இருந்தப னனுமிவர்க் கிரவுநல்கினான். |
(இ -ள்.) விருந்து உறு சேனை வெம் வீரர் - புதிதாக அங்கு வந்து
தங்கிய கொடிய சேனைவீரர்கள், இன் அமுது அருந்தினர் - |