பண்கொள்கலயம் பதினாறு - கண்கொள், பருமம் பதினெட்டு முப்பத்திரண்டு,
விரிசிகை யென்றுணரற் பாற்று" என்பதனாலுணர்க;) எண்கோவை
யென்றலுமுண்டு.                                             (272)

120.-இதுவும் அது.

     (இ -ள்.) நீடுறு தருக்களில் நிரைத்த மா - பெரிய மரங்களில்
வரிசையாகக்கட்டப்பட்ட யானைகள்,- அதன் கோடு இற எறிந்து -
(தம்மைக்கட்டப்பெற்ற) அந்தந்த மரத்தின் கிளைகளை ஒடியும்படி முறித்து,
கைகொள்ளும் - துதிக்கையிற்கொள்ளுதலாலுண்டாகிற, ஓதையால் -
ஓசையினால்,- மாடு உறு பொங்கர்வாய் வதிந்தபுள்-அருகிற் பொருந்திய
சோலைகளில் தங்கியுள்ள பறவைகள்,-வெரீஇ - அஞ்சி, பேடொடு சேவல்
மெய் பிரிந்து - (ஒன்றாய்க்கூடியிருந்த) பெண்பறவைகளோடு
ஆண்பறவைகளும் (தம்மிற்) பிரிந்துபோய், நேடும் - (பிறகு ஒன்றை யொன்று)
தேடும்; (எ - று.)-ஆல் - ஈற்றசை.

    ஆணும்பெண்ணுமாய்க் கூடியிருந்த பறவைகள், அச்சேனையின்
யானைகள் மரங்களை முறித்த ஓசையைக் கேட்டு அஞ்சிப்பிரிந்துத் தனித்தனி
பறந்து பிரிந்து பிறகு ஒன்றையொன்று தேடுவனவாயின வென்க.
ஒலியைக்கேட்டு அஞ்சிப்பறத்தல், பறவைகளின் இயல்பு:  வெரீஇ=வெருவி:
சொல் விகாரப்பட்டு அளபெடுத்ததனால்.  சொல்லிசையளபெடை.  பேடு,
சேவல் என்பன - முறையே, பறவைகளின் பெண்மை ஆண்மைப்
பெயர்களாம்.                                             (273)

121.-குதிரைகளின் செயல்.

     (இ -ள்.) தீது அறு சில பரி - (அச்சேனையிலுள்ள) குற்றமற்ற சில
குதிரைகள்,-ஊதையின் மரன் அசையுற-பெருங்காற்றினால் மரங்கள் அசைய,
பொறா - (அந்த விசையைப்) பொறாமல், - வடம் மோதுறு முளையுடன் -
கயிறுகொண்டு கட்டப்பட்ட முளைத்தறிகளுடனே, முடுகு வேட்டம் ஆய் -
விரைவான ஓட்டங்கொண்டு, செல்வன் பாசறை மாதிரம் உற -
செல்வச்சிறப்புடையவனாகிய தருமபுத்திரனது படைவீட்டின் பக்கங்களிற்
பொருந்தும்படி, பல வாளி போதும் - பலதரம் வட்டமாகச் சுழன்று
செல்லலாயின; (எ - று.)-ஆல் - அசை.