கருத்து. வீடுமனை 'தவத்தினாலுயர்ந்த கோ' என்றது, இளமையிலேயே தான்
மணந்து கொள்வதில்லை என்றும், முடிசூடுவதில்லை என்றும் பிரதிஜ்ஞை
செய்து ஒழித்தற்கரிய மண்ணாசை பெண்ணாசைகளை யொழித்துத் தனது
ஆயுளளவும் பிரமசரியத்தையே மேற்கொண்டிருப்பதனா லென்க. நகா கூறல்
என இயையும்; நகா என என்று இயைத்துப் பொருள் கூறலு மொன்று.
மூத்தோர் கூறிய சொல்லுக்குச் செவி கொடாததனால், துரியோதனனை
'போதமில்லான்' என்றார்.                                     (349) 

197.-இதுமுதல் மூன்றுகவிகள் -ஒரு தொடர்:
துரியோதனன் விதுரனைநோக்கிக் கூறுவன.

     (இ - ள்.) (பிறகு),-அரம் கடி சமரம் வேலான் - அரத்தினால் அராவிக்
கூர்செய்யப்பட்டபோர்க்கு உரியவேலாயுதத்தையுடையவனாகிய துரியோதனன்,-
இரங்கி. நின்று உருகும் நெஞ்சின்-(கீழ் நடந்த செயலுக்காக) இரக்கங் கொண்டு
உருகுகின்ற மனத்தையுடையவனாகிய, தன் இளைய பிதாவை-தனது சிறிய
தந்தையான விதுரனை, நோக்கி-பார்த்து,-அழல்பொழிஉருமின் சொல்வான்-
நெருப்பைக் கக்குகின்ற இடிபோல (மிகக்கொடுமையாக)ச் சில வார்த்தை
கூறுவானாயினான்:-உரம் குடி இருந்ததோளான் - வலிமைபொருந்திய
தோள்களையுடையவனாகிய தருமபுத்திரன், உரிமையின் எமக்கு தோற்ற-
(சூதாடி) முறைமையாகவே எமக்குத் தோற்றுவிட்ட, துரங்கமும்-
குதிரைகளையும், களிறும்-யானைகளையும், தேரும் - தேர்களையும், துறை
துறை-அந்தந்த இடங்களிலிருந்து, கவர-கவர்ந்து கொண்டுவரும்படி, சொற்றி
(நமது ஏவலாளர்க்குக்) கட்டளை கூறுவாய்; (எ - று.)

    துரியோதனன் தருமனுடைய சதுரங்கசேனைகளையும் கவர்ந்து வர
ஏவலாளர்களுக்குக் கட்டளையிடும்படி கூறுகிறான். மிக்க கொடுமையுடைமையால்,
துரியோதனன் வார்த்தைக்கு இடி உவமை கூறப்பட்டது. 'உரிமையின் எமக்குத்
தோற்ற' என்பதற்கு - எமக்கு உரியவையாகும்படி தோற்ற என்றுமாம்.
'துரங்கமும் களிறும் தேரும்' என்றது - உபலக்ஷணத்தாற் காலாட்படையையுங்
குறிக்கும்.  சொற்றி-ஏவலொருமை வினைமுற்று; சொல்-பகுதி, ற்-எழுத்துப்பேறு,
இ - விகுதி: பகுதியீற்றுலகரம் றகரமானது - சந்தி.  அரம் கடி வேல் -
"அரந்துடைத்தவைவேல்" என்றார் சிந்தாமணியாரும்.                  (350)