தனக்குக் குதிரைநூலில் நன்கு பயிற்சியுண்டு என்ற உறுதி தோன்றுமாறு
குதிரைசெலுத்துதற்குஏற்ற கருவியுடனே விராடராசன் குதிரையேறும்
முன்றிலிலே நகுலனானவன் சென்றிருந்தனனென்பதாம்.  தருக்கு - செருக்கு:
இங்குக் குதிரை நூலில் வல்லவனென்று தன்மனத்துக் கொண்டுள்ள உறுதியான
எண்ணம். மத்திகை - குதிரையைச் செலுத்துகையில் உபயோகிக்குஞ் சாட்டை.
கம்பிஎன்பதற்கு - உளவுகோல் என்று கூறினாரு முளர்.               (21)

22.-இதுமுதல் மூன்றுகவிகள் - விராடராசன்வினவ,
நகுலன் தன்னை இன்னானென்று தெரிவித்தமைகூறும்.

     நான்கு கவிகள் - ஒருதொடர்.

     (இ - ள்.) புரவிமேல் இருந்தோன் -குதிரையின்மேலேறியிருந்தவனான
விராடன்,-சென்றவன் தன்மேல்-(மன்னவன் குதிரையேறும் முன்றிலிலே
போய்ச்) சேர்ந்திருந்தவனான நகுலன்மீது, செழுந் தடகண் மலர் பரப்பி -
வளமுள்ள பெரிய (தன்) கண்மலரைப் பரவச்செய்து [பார்த்து], 'வல் தொழில்
புரவி வான் தொழிற்கு உரியோய்-வலியதொழிலாகிய குதிரைசெலுத்துஞ்
சிறந்ததொழிலுக்கு உரியவனே! நீ-, எ வயின்நின்று வந்தனை-
எவ்விடத்திலிருந்து வந்தாய்?' என்றலும்-என்று வினாவியவுடனே,-அவன்உம்-
அந்த நகுலனும், இயம்பினன்-(பின்வருமாறு) கூறலானான்: 'விசயற்கு
இளையவன் - அருச்சுனனுக்கு அடுத்த தம்பியாகிய, நகுலன் என்று எல்லாம்
குன்றின்உம் தன் பேர் எழுதினோன்-நகுலனென்று சொல்லப்பட்டு
எல்லாமலையிலும் தன்பேரைத் தீட்டினவன் (ஒருவன் உளன்): அவன் தன்
கொற்றம் - அவனுடைய வெற்றியை, யார் கூறுதற்கு உரியார் - யார்
சொல்லவல்லார்? (எ - று.)

     யாவரும் அறியும்பொருட்டு உயர்ந்தஇடத்தில் பேரையெழுதி வைத்தல்,
இயல்பு.                                                  (22)

23.	மற்றவன்றனதுவாசிமந்துரைக்குத்தலைவராய்வாழுமாக்களில்யான், உற்றவனொருவன்வாம்பரிவடிவு முரைதகுசுழிகளுமொளியும், பற்றியநிறனுங்கந்தமுங்குரலும் பல்வகைக்கதிகளும் பிறந்த, சொற்றகுநிலனுமாயுவுமுணர்வேன் றுயருறுபிணிகளுந்தவிர்ப்பேன்.

 
     (இ - ள்.) யான்-,-அவன் தனது -அந்தநகுலனுடைய, வாசி மந்துரைக்கு
- குதிரைகட்டுங் கொட்டிலுக்கு, தலைவர் ஆய்-, வாழும்-, மாக்களில் -
மனிதர்களுள், உற்றவன் ஒருவன் - சேர்ந்தவனான ஒருத்தன்:  (யான்),-வாம் -
தாவிச்செல்லுகின்ற, பரி வடிவு உம் - குதிரையின் வடிவமும், உரை தகு -
சிறப்பித்துச்சொல்லத்