பெட்டியிலிருக்கும் மதலைக்குக் கூட்டிலிருக்கும் சிங்கக்குட்டி யுவமை:
"க்ரமேணமஞ்ஜூஷிகயா த்ருதம்தயா - சிசும் ஹரே. பஞ்ச ரவர்த்திநம்யதா
தரங்கடோலாந்தரலாலிதம் சநை:- நிநாய தம்ஸூ தபுராந்திகம் நதீ" என்ற
பாலபாரதம் காண்க. சஞ்சரத்திரை என்றும் பாடம்.அன்றே - அசையுமாம். (195)

41.-கரைமருங்கையடைந்த சாரதியும் அவன்மனைவியும்
நதிப்பெருக்கில் வந்தபெட்டியிற் குமரனைக்கண்டு
பெருமகிழ்ச்சியடைதல்.

     (இ - ள்.) கோடு அகம்பட - இரு கரையும் தன்னுட்பொருந்த, வரும் -
வந்த, புனல் - நீர்ப்பெருக்கைக்காண்பதில், விழைவினால் - விருப்பினால்,
குளிர்துறை மருங்கு - குளிர்ந்தநீர்த்துறையினருகே, உற்றோர் -
அடைந்தவராகிய, சூடகம் கை அம்புயம் மலர் இராதை உம் சூதபுங்கவன்
தான்உம் - சூடகமணிந்த கையாகிய தாமரை மலரையுடைய
இராதையென்பவளும் பாகர்தலைவனாகிய அதிரத னென்பானும், ஒழுகிய -
(நதிப்பெருக்கிலே) அடித்துக்கொண்டு வரப்பெற்ற, பேடகத்திடை - பெட்டியிலே,
தினபதி பெருங் குமரனை கண்டு - சூரியனுடைய சிறந்தகுமாரனைப் பார்த்து,
ஆடகம் குலம் அடைந்தது ஒத்து - (வறியோர்) பொற்குவியலைப்பெற்றாற்
போன்று, அரும்பெறல் ஆதரத்தொடு.பெறுதற்கு அரிய பிரீதியோடு, கொண்டார்
- (அந்தப்புதல்வனையெடுத்து வளர்க்குமாறு) கொண்டார்கள்;

     இராதை - அதிரதன்மனைவி. பெட்டியில் குழந்தையுடனே ரத்னங்களையும்
வைத்து நதிப்பெருக்கிற் குந்திதேவி விட, அதிரதன் அந்தப் பெட்டியை
எடுத்தபோது இரத்தினங்களுடனே பெற்றானாதலால், அந்தப்புதல்வனுக்கு வஸு
ஷேணன் [சம்பத்தின்தொகுதியையுடையவன்] என்று பெயரிட்டான்.
குண்டலக்காதனாய்த் தோன்றியதனால், கர்ணனென்று பெயர். இப்பெயர் சூரியன்
அசரீரிவாணியாய் வழங்கியதென்பர், மேல் கிருட்டிணன் தூது சருக்கம் செய்யுள்
154-இல்.                                                    (196)

42.-அதிரதன்மனையில் வளர்ந்த கர்ணன் பரசுராமனிடம்
வில்முதலியன கற்று விளங்குதல்.

    (இ-ள்.) அதிரதன் திரு மனையினில் - அதிரதனுடைய சிறந்த வீட்டிலே,
விழைவுடன் - விருப்போடு, அரும்பிய பனி கற்றை மதி எனும்படி - தோன்றிய
குளிர்ச்சியின் தொகுதியையுடைய பிறைச் சந்திரனென்னுமாறு, வளர்ந்து-, திண்
திறல் புனை - மிக்கவலிமை