பொன்னுலகமாகிய சுவர்க்கத்தில் உள்ளனயாவும் பொன்மயமாதலால்
'கனகதரு' எனப்பட்டது. கனகத்தை மலருக்கு அடையாக்கினுமாம்: கொன்றைமலர்
பொன்னிறமாதலால், கனகதருமலரோடு உவமிக்கப்பட்டதென்க. இதழி-நிறைந்த
இதழ்களையுடையதெனக் காரணப்பெயர்போலும். மறை- மறைக்கப்படுவது என
மந்திரத்துக்குக் காரணக்குறி; "மந்த்ரம்யத்நேந கோபயேத்" [மந்திரத்தை
முயற்சியால்மறைக்கவேண்டும்] என்பது, விதி.                        (187)

50.-வென்றுமீளுகையில்,சிவபிரான்மாலை குறுக்கிட,
அபிமன் கடவாது பகையைமுறியடித்து மடிவதாகத்துணிந்துபொருதல்.

     (இ-ள்.) எறி தொடையல்-(சயத்திரதனால்) வீசப்பட்ட அம் மாலை, சங்கபாணி
மருமகன் இகலும் அமர் வென்று மீளும்அளவையில்-சங்கத்தைக் கையிலுடைய
கண்ணனுக்கு மருமகனான அபிமன்  எதிர்த்துச்செய்த போரில்செயித்து (வீமனுடன்
சேர்தற்கு)த் திரும்புமளவில், நெறியிடை - வழியிலே, விளங்கி - பிரகாசித்து, வாள
கிரி என - சக்கரவாளமலைபோல, நிமிர்வுஉற - விளக்கம் பொருந்த, சூழ
வளைந்துவருதலும் - சுற்றிலுஞ் சூழ்ந்து பொருந்தியிட,-(அதுகண்டு அபிமன்),
அறிவுடன்இறைஞ்சி - (இது இறைவனதுமாலையென்ற) அறிவோடு வணங்கி, 'ஆதி
பகவனதுஅணி முடி அலங்கல் ஆகும்-முதற்கடவுளான சிவபிரானது அழகிய
திருமுடியில்தரித்த மாலையாகும்; (இதனைத் தாண்டிடுதல் தகுதியன்று): (ஆதலால்),
இனி-,மண்டுபோரில் - நெருங்கிய யுத்தத்தில், அடையலர் முறிய-பகைவர் அழிய,
அமர் செய்து-போர் செய்து, முடிதும்-இறப்போம்,' என-என்றுஎண்ணி, மீள வந்து
முடுக -திரும்பிவந்து போர்செய்யத்தொடங்க,-(எ - று.)-"இதழித்தொடைவிலங்கியது"
என்மேல் 52-ஆங் கவியோடு முடியும். பி - ம்: நெறியிடைவிலங்கி.

     சக்கரவியூகத்தினிடையில் தனியனாய் அகப்பட்டுக்கொண்ட தனக்கு
வேறுஎவரும் துணையில்லாமையாலும், அவ்வியூகத்தினின்று மீண்டுவருதற்குத் தான்
முழுவதும் வழியறியாமையாலும், அபிமன்முடிவோமென்று கருதினான்.
சக்கரவாளமலை - பூமியைச் சூழ்ந்த கடலைச்சுற்றிலும் கோட்டைமதில்போலச்
சூழ்ந்துள்ள தொரு பருவதமென்ப. ஆதிபகவன்- இருபெயரொட்டு.         (188)

வேறு.

51.- மூன்றுகவிகள்-அம்மாலையைக் கடத்தற்கு அஞ்சி
வீமன்வெளிநின்றமை கூறும்.