:: TVU ::

பக்கம் : 1049

தேவர்கள் திசைகளிலே காவாநிற்பத் தீஞ்சுவை ஆவியார் அமுது அயின்று நம்பி யிருந்தபோது தேவியர் கண்ணாற் பருகுவார்போன்று நம்பியைச் சூழ்ந்தனர் என்க.
(563)
ஒரு விஞ்சைத் தூதன் திவிட்டன்பால் எய்துதல்
வேறு
1694.	வஞ்சியங் கொம்ப னாரு மன்னனு மிருந்த போழ்தின் விஞ்சைய னொருவன் றோன்றி விசும்பினா றிழிந்து வந்து மஞ்சிவர் சோலை வாயில் வாயிலோன் வாயி லாக அஞ்சன வண்ணன் செந்தா மரையடி வணங்கி னானே.
(இ - ள்.) வஞ்சியங் கொம்பனாரும் - வஞ்சிக்கொடிபோன்ற தேவியரும், மன்னனும் இருந்த போழ்தின் - திவிட்ட நம்பியும் இவ்வாறு வீற்றிருந்த அமயத்தே, விஞ்சையன் ஒருவன் - விச்சாதர தூதன் ஒருவன், விசும்பின் ஆறு இழிந்து வந்து தோன்றி - வான் வழியாக வந்து இறங்கி வாயிலிற்றோன்றி, மஞ்சு இவர் வாயில் - முகில் தவழும் கோபுரவாயில் காக்கும், வாயிலோன் - காவலன், வாயிலாக - தன் வருகையை அரசனுக்குக் கூறித் தனக்கு அரசனுடைய வரவேற்பைக் கூறும் வாயிலாய்ச் சென்று, அஞ்சன வண்ணன் - திவிட்ட நம்பியின், செந்தாமரை அடி வணங்கினான் - செந்தாமரை போன்ற திருவடிகளிலே வீழ்ந்து வணங்கினான், (எ - று.) நம்பி தேவியரோடே இவ்வாறு இருந்தபொழுது, ஒரு விச்சாதரன் விசும்பாறாக வந்து வாயிலோனுக் கறிவித்து அவன் வாயிலாக நம்பியை அணுகி அடிகளிலே வணங்கினான், என்க.
(564)

திவிட்டன் சடியின் நலம் வினாதல்
1695.	வந்தவன் வணங்க லோடு மாமனை ¹நுதலி யென்னை கந்தணை யானை வேந்தன் கழலடி செவ்வி யோவென் றந்தமி லாழி யாள்வான் வினவலி னருளு மாறென் றிந்திர னனைய நீராற் கிறைஞ்சலு மிருக்க வென்றான்.
(இ - ள்.) வந்தவன் வணங்கலோடும் - அவ்வாறு வந்த விச்சாதரன் வணங்கியவுடனே, மாமனை நுதலி - தன் மாமனாகிய சுவலனசடி மன்னனை நினைவு கூர்ந்தவனாய், என்னை, கந்து அணையானை வேந்தன் கழல்அடி செவ்வியோ என்று - தூதனே! தூணில் கட்டப்படும் அரசுவாவினையுடைய சடிமன்னருடைய வீரக்கழலணிந்த திருவடிகள் வலியவோ? என்று, அந்தமில் ஆழி ஆள்வான் வினவலின் - அழிவற்ற சக்கரப்படையை உடைய நம்பி வினவினனாக, அருளுமாறு என்று - அத்தூதனும், “அடிகள் விரும்பியருளிய படியே“ என்று கூறி, இந்திரன் அனைய நீராற்கு - தேவர்கோமானை ஒத்த மாண்புடைய திவிட்டநம்பியை, இறைஞ்சலும் - வணங்கியவுடன், இருக்க என்றான் - தூதனே அமர்க என்று உபசரித்தான், (எ - று.)


(பாடம்) 1 நுவலி.