:: TVU ::

பக்கம் : 1050

என்னை - என்றது, ஒருவரோடு சொல்லாட்டம் தொடங்குவார் அவரை முன்னிலையாக்கும் பொருட்டு முன்னர்த் தொடங்கும் ஒரு சொல். என் + ஐ - என் தலைவனாகிய எனினுமாம். வந்து வணங்கிய விச்சாதரனை நோக்கி, மாமனாகிய சடியரசனின் நலத்தை வினாவ, அவனும் அடிகள் விரும்பியவாறே என்று வணங்க, அமர்க என்று நம்பி கூறினான், என்க.
(565)

தூதன் திருமுகம் கொடுத்தல்
1696.	உரிமையோ டிருந்த போழ்தி னுணர்த்துதற் குரித்தென் றெண்ணித் திருமுகந் தொழுது ¹காட்டத் தேவிதன் மருங்கு நின்ற உரிமைகொ ளுழைய ருள்ளா ளொருத்திவா சித்து ணர்த்த அருமுடி யொழிய வெல்லா வணிகளு மவனுக் கீந்தான்.
(இ - ள்.) உரிமையோடு இருந்த போழ்தின் - தூதன்தான் கொணர்ந்துள்ள செய்தி அரசன் தன் உரிமை மகளிரோடே வீற்றிருக்கும் அமயத்தே, உணர்த்துதற்கு உரித்து என்று எண்ணி - கூறுவதற்கு மிகத் தகுதியுடையதே ஆம் என்று கருதி, தொழுது திருமுகம் காட்ட - நம்பியை வணங்கித் தான் கொணர்ந்த திருமுகவோலையை நம்பிபாற் கொடுக்க, தேவிதன் மருங்கு நின்ற - சுயம்பிரபையின் பக்கத்தே நின்ற, உரிமைகொள் உழையர் உள்ளாள் ஒருத்தி - திருமுகம் வாசிக்கும் உரிமையை உடைய அவ்வுழைக்கல மகளிருள் ஒருத்தி, வாசித்து உணர்த்த - நம்பியின் குறிப்புணர்ந்து அத்திருமுகத்தே பொறித்துள்ள செய்தியை ஓதி அறிவியா நிற்ப, அருமுடி ஒழிய எல்லா அணிகளும் - அரசற்கே சிறந்துரிமையுடைய திருமுடிக்கலன் ஒன்றை ஒழிய அரசர்கள் அணிதற்குரிய ஏனைய எல்லா அணிகலன்களையும், அவனுக்கு ஈந்தான் - அந்நற்செய்தியைக் கொணர்ந்த தூதனுக்கு மகிழ்ந்து வழங்கினான், (எ - று.)


(பாடம்) 1 காட்டித்.