:: TVU ::

பக்கம் : 1064

அம்மகவிற்கு வாலாமை கழித்து இறைவன் திருவடிச் சேடம் புனைதல்
1717.	சுண்ணநெய் யெழுபக லாடித் தொன்னகர் நண்ணிய நானநீ ராடி நம்பியைப் புண்ணியா ¹வாசனஞ் செய்து புங்கவன் திண்ணிய வடிமலர்ச் சேடஞ் சேர்த்தினார்.
(இ - ள்.) தொல்நகர் - பழைதாகிய அப்போதனமா நகரத்தே, எழுபகல் - நம்பி பிறந்தநாள் தொடங்கி ஏழுநாளளவும், சுண்ணம் நெய் ஆடி - சுண்ணம் நெய் ஆடுதலாகிய சடங்கினை இயற்றி, நண்ணிய நானநீர் ஆடி - எழுநாளின் பின் பொருந்திய நீராட்டம் செய்து, நம்பியை - அம்மகவினை, புண்ணியா வாசனம் செய்து - வாலாமை போக்கி, புங்கவன் - அருக பரமேட்டியின், திண்ணிய அடிமலர்ச் சேடம் சேர்த்தினார் - அழிவற்ற திருவடிச்சேடத்தையும் சூட்டினார், (எ - று.) புண்ணியாக வாசனம் - புண்ணியா வாசனம் என நின்றது, அது :- வாலாமை போக்குதல் என்னும் பொருட்டு. சேடம் - நிர்மாலியம். நம்பி பிறந்தநாள் தொடங்கி ஏழுநாள் காறும் சுண்ணம் நெய் ஆடிப் பின்னர் நீராடி வாலாமை போக்கி நம்பிக்குப் புங்கவன் திருவடிச் சேடம் சேர்த்தினார் என்க.
(587)

சுற்றத்தார் சூழ்தல்
1718.	வழுவலி னாஞ்சிலான் வண்பொ னாழியான் தழுமல ரலங்கலான் றாதை தானெனச் செழுமல ரணிகுழற் றேவி மாரென எழுபெருங் கிளைகளு மினிதி னீண்டினார்.
(இ - ள்.) வழுவல் இல் நாஞ்சிலான் - தவறுதலில்லாத கலப்பைப் படையுடைய விசயனும், வண்பொன் ஆழியான் - வளப்பமுடைய அழகிய ஆழிப்படையுடைய திவிட்ட நம்பியும், தழுமலர் அலங்கலான் தாதைதான் என - தழுவிய மலர்மாலை அணிந்த அத்திவிட்ட நம்பியின் தாதையாகிய பயாபதியும், என்றித்தொடக்கத்து ஆடவரும், செழுமலர் அணிகுழல் தேவிமார் என - செழித்த மலர் மாலையாலே அழகுறுத்தப்பட்ட கூந்தலையுடைய மகளிர்களாகிய மிகாபதி முதலிய தேவியர்களும் என்று கூறப்பட்ட இருபாற்பட்ட, எழுபெருங் கிளைகளும் - அன்பு மிக்கு எழாநின்ற கேளிர்கள் அனைவரும், இனிதின் ஈண்டினார் - இன்புடையராய் வந்து எய்தினார், (எ - று.)


(பாடம்) 1 வாசனை.