:: TVU ::

பக்கம் : 1075

விசயன் வளர்தற் சிறப்பு
1738.	விண்டா ரில்லா வெந்திற ¹லோன்பொற் சுடராழித் தண்டார் மார்பன் றன்மக னன்மா மணியேபோல் கண்டார் கண்களி ²கூருஞ் செல்வக் கவினெய்தி வண்டா ரைம்பான் மங்கையர் காப்ப வளர்கின்றான்.
(இ - ள்.) விண்டார் இல்லா வெந்திறலோன் - பகைவர் என்போர் யாண்டும் இன்மைக்குக் காரணமான வெவ்விய ஆற்றலுடையோனும், பொன் சுடர் ஆழி - பொன்னாலியன்ற ஒளியுடைய சக்கரப்படையைத் தரித்தவனும், தண்தார் மார்பன் தன் - குளிர்ந்த வெற்றி மாலையை அணிந்த மார்பையுடை யோனுமாகிய திவிட்டநம்பியின், மகன் - மகனாகிய விசயனும், நன் மா மணியே போல் - நல்ல மாண்புடைய மாணிக்கமணியே போன்று, கண்டார் கண் களிகூரும் - தன்னைப் பார்த்தோருடைய கண்கள் காட்சி இன்பத்தாலே பெரிதும் மகிழும்படி, செல்வக் கவின் எய்தி - செல்வமாகிய அழகு மிக்கு, வண்தார் ஐம்பால் மங்கையர் காப்ப - வளப்பமுடைய பூமாலை சூட்டப்பெற்ற கூந்தலையுடைய செவிலித் தாயரும் பிற மகளிரும் புறங்காத்தோம்ப, வளர்கின்றான் - வளர்வானாயினான், (எ - று.) வண்டு ஆர் ஐம்பால் எனினுமாம். தேவர் இனித் திவிட்டநம்பியின் மக்கள் வளர்தற் சிறப்பைக் கூறிய தொடங்கினார் என்க. பகைவரில்லாத பேராற்றலுடைய திவிட்டனின் மகன் நன்மணி போலே கண்டார் கண் களிகூரக் கவின் எய்தி மங்கையர் காப்ப வளர்கின்றான் என்க.
(608)

இதுவுமது
1739.	கண்கவர் சோதிக் காமரு தெய்வம் ³பலகாப்பத் தண்கமழ் போதிற் றாமரை யாளுந் தகைவாழ்த்த விண்கவர் சோதித் தண்கதி ரோன்போல் விரிவெய்தி மண்கவர் சோதித் தண்கதிர் வண்ணன் வளர்கின்றான்.
(இ - ள்.) கண்கவர் சோதி காமரு தெய்வம் - கட்பொறியைக் கவர்தலுடைய பேரொளி படைத்த அழகிய தேவர்கள் பலர், காப்ப, விசயனைக் காத்தோம்பவும், தண்கமழ் போதில் தாமரையாளும் - குளிர்ந்த மணமிக்க மலரிலே வாழ்கின்ற திருமகளும், தகை வாழ்த்த - விசயனுடைய சிறப்பினை வாழ்த்தவும், விண்கவர் சோதி தண் கதிரோன்போல் - விசும்பு


(பாடம்) 1 லொண் பெற். 2 கொள்ளுஞ். 3 பலர் காப்பத்.