:: TVU ::

பக்கம் : 1096

(இ - ள்.) பொன் நகர்ப் புறத்தது ஓர் புரிசை வார்பொழில் தன் அகத்து - அழகிய போதனநகரத்தின் பக்கத்தே உளதாகிய ஒரு மதில்சூழ்ந்த நீண்ட பூம்பொழிலின் ஊடே, இயற்றிய தயங்கு பொன் நகர் - இயற்றப்பட்ட விளங்குகின்ற பொன்னாலியன்றதொரு அரண்மனையின்கண், மன்னர்கட்கு இறைவன் வந்து இருப்ப - வேந்தர் வேந்தனாகிய அருக்ககீர்த்திவந்து தங்கி இருந்தானாக, மண்மிசை இந்நகர்க்கு இறைவனும் - மண்ணுலகின்மேல் உள்ள இப் போதன நகரத்தரசனாகிய திவிட்டமன்னனும், எதிர் கொண்டு ஏகினான் - அருக்ககீர்த்தியை எதிர்கொள்ளச் சென்றான், (எ - று.) போதன நகரத்தின் புறத்தே புரிசைசூழ் பொழிலின்கண் அருக்ககீர்த்தி வந்திருப்ப, போதன மன்னனாகிய திவிட்டன் அவனை அழைக்க எதிர்கொண்டு சென்றான் என்க.
(641)

இதுவுமது
1772.	கண்சுட ரிலங்குவேற் ¹காள வண்ணனும் வெண்சுட ரொளியவன் றானும் விஞ்சையர் தண்சுடர்த் தமனிய வண்ணன் றன்னொடும் மண்சுட ருறுப்பதோர் வகைய ராயினார
(இ - ள்.) கண்சுடர் இலங்குவேற் காள வண்ணனும் - தன்னிடத்தே சுடர்விட்டு விளங்குகின்ற வேற்படையுடைய நீல வண்ணனாகிய திவிட்டனும், வெண்சுடர் ஒளியவன தானும் - வெளிதாய்ச் சுடரும் ஒளியையுடைய விசயனும், விஞ்சையர் தண்சுடர்த் தமனிய வண்ணன் தன்னொடும் - விச்சாதரவேந்தனாகிய குளிர்ந்த ஒளியையுடைய பொன்வண்ணனாகிய அருக்க கீர்த்தியும் ஒன்றுகூடி, மண்சுடர் உறுப்பதோர் வகையார் ஆயினார் - இம் மண்ணுலகத்தையே ஒளிரச்செய்யும் ஒரு தன்மையுடையர் ஆனார், (எ - று.) விசயனும் திவிட்டனும் அருக்ககீர்த்தியுமாகி மூன்று மன்னர் மக்களும் மூன்று சுடர்கள் உலகத்தை விளக்குவதைப் போன்று தம்முடல் ஒளியால் உலகை விளக்கினர் என்க.
(642)

இதுவுமது
1773.	இருபுடைக் கிளைகளும் விரவி யின்னணம் தெருவுடைத் ²திசைமுகந் ³தெளிப்பத் தேர்த்தரோ மருவுடை மகரநீர் வளாகம் வானவர் ⁴உருவுடை யுலகம்வந் திழிந்த தொத்ததே.


(பாடம்) 1காளை. 2 திருமுகம். 3 தெளிப்ப தொத்தரோ. 4 உருவிடை.