:: TVU ::

பக்கம் : 1200

(இ - ள்.) எளியவர் தம்மை - ஏழைகளை, இடைப் பல சொல்லி - இடைப்போதில் இனியன போன்ற வஞ்சகமொழிகள் பலவற்றைக் கூறி, உடைப்பொருள் வெஃகி - அவர்கட்கு உரிய பொருள்களை விரும்பி, ஒறுத்த பயத்தான் - அவற்றைக் கவர்ந்து அவர்களைத் துன்புறுத்திய தீவினையின் பயனாக, முடைப்பொலி மேனியை - ஊனாலே விளக்கமுடைய அவர்களுடைய உடலை, முள் மத்திகையால் புடைப்ப - முள் அமைந்த சம்மட்டியாலே தாக்க, நடுங்கிப் புரள்வர் ஒருசார் - துன்புற்று நடுங்கியவர்களாய்த் தரையில் வீழ்ந்து புரளா நிற்பர் ஒரு பக்கத்தே, () எளியவரைப் பொருளை விரும்பி இன்னல் செய்தவர்களை முட் சம்மட்டியாலே புடைப்ப, அவர் நடுங்கிப் புரள்வர் என்க.
(826)

1937.	வெறுப்பன வேசெய்து மேலா யவரைக் குறிப்பல சொல்லிய நாவைக் கொடிற்றால் பறிப்பர் பரிய வயிரமுட் கொண்டு செறிப்ப ருகிர்வழி யேறச் சிலரே.
(இ - ள்.) வெறுப்பனவே செய்து - பிறர் வெறுத்தற்குரிய தீச்செயல்களையே யாண்டும் செய்து, மேல் ஆயவரை - மேன்மக்களாகிய சான்றோரை, குறிப்பு அல சொல்லிய - தகுதிக்கு ஒவ்வாத வசை மொழிகளைக் கூறி வைத நாவை - தீயவர்களின் நாக்குகளை, கொடிற்றால் - குறட்டாலே, பறிப்பர் - பிடுங்கி, உகிர்வழி - நகக்கண் வழியே, பரிய வயிரமுள்கொண்டு - பருத்த வயிரத்தாலியன்ற முட்களை எடுத்து, ஏறச்செறிப்பர் - நெடிது உள்ளே ஏறுமாறு செருகா நிற்பர், சிலர் - சிலவர், (எ - று.) பிறர் வெறுத்தற்குரிய தீச் செயலையே செய்பவராய்ச் சான்றோரைக் கொடிய சொல்லிய கயவர்களின் நாவினைக் குறட்டாலே பறிப்பர். அவருடைய நகத்திடைய வயிர ஊசியைப் பாய்ச்சுவர் என்க.
(827)

1938.	பொரிப்பர் சிறைசெய்து பொங்கெரி மாட்டிக் கரிப்பர் கனல்படு காரக ¹லேற்றித் திரிப்பர் பலரையுஞ் செக்குர லுட்பெய் துரிப்ப ருடலை யவரு மொருபால்.
(இ - ள்.) சிறைசெய்து - இந்நரகரைச் சிறைக்கோட்டங்களிலே இட்டு, பொங்கு எரிமாட்டி - கிளருகின்ற தீயைக் கொளுவி, கரிப்பர் - கருக்குவர், கனல்படு கார் அகல் ஏற்றி - தீயிற் காய்ந்த கரிய இருப்பு அகல்களிலே யிட்டு, பொரிப்பர் - பொரித்திடுவர், பலரையும் - பற்பல நரகர்களையும், செக்கு உரலில் பெய்து - செக்காகிய உரல்களினுள்ளே தள்ளி, திரிப்பர் - உலக்கைகளால் ஆட்டா நிற்பர், உடலை உரிப்பர் - உடலின்கட்டோலை உரியா நிற்பர், அவரும் ஒருபால் - அத்தகையோரும் ஒரு பக்கத்தே உளர், (எ - று.)


(பாடம்) 1 லெற்றித்.