:: TVU ::

பக்கம் : 1221

நலமில்லவரும் (1978) அஞ்சு கலந்துண்பித்தோரும் உயர்ந்தோர் விலக்கியவற்றைச் செய்வோரும் என்று கூட்டுக.
(869)

1980.	அன்ன பிறவியு ளாங்கவ ராபவர் இன்னுஞ் சிலவ ரிழிகதிப் ¹பாற்பட்டுத் துன்னிய போழ்தே சுருங்கி யொழிபவர் என்னும் பிறர்க ளறிவிற் கிகந்தார்.
(இ - ள்.) அன்ன பிறவியுள் - அம்மிலைச்சர் பிறப்பினுள், ஆங்கு அவராபவர் - அவ்விடங்களிலே யாம் முன் கூறியவர்கள் பிறப்பர், இன்னும் சிலவர் - வேறு சிலரும், இழிகதிப்பாற்பட்டு - இவ்விழிந்த மிலைச்சர் பிறப்பிற் பிறந்து, துன்னிய போதே - அப்பிறவியை எய்திய பொழுதே, சுருங்கி - வாழ்நாள் குறுகி, ஒழிபவர் - இறப்பார், என்னும் பிறர்கள் அறிவிற்கு இகந்தார் - (இவர் யாரோ எனில்) எவ்வாற்றானும் பிற சான்றோர் அறிவுரைகளைக் கடந்தவர், (எ - று.) செய்வோரும் அன்னபிறவியுள் ஆபவர் எனமுடிக்க. வேறு சிலர் இப்பிறப்பிற் பிறந்து சின்னாளில், இறந்து மீள்வர் என்க.
(870)

1981.	மக்கள் ²வதியு மிரண்டரைத் தீவினுள் தக்க நிலத்துப் பிறந்தவர் தம்முளும் முக்குலத் தாரொடுங் கூடா முயற்சியர் ³ஒக்கலைப் போல்வார் பலரு முளரே.
(இ - ள்.) மக்கள் வதியும் இரண்டரைத் தீவினுள் - மனிதர் வாழ்தற்குரிய இரண்டரைத் தீவுகளிலும், தக்க நிலத்து - சிறந்த நாடுகளிலே, பிறந்தவர் தம்முளும் - பிறந்த மனிதருள்ளும், முக்குலத்தாரொடு கூடா முயற்சியர் (சேகரும் மிலைச்சரும் ஒழிந்த மனிதரும் திப்பியரும் போகரும் ஆகிய) மூன்று குலத்தினுட் டோன்றியும், அவர்தம் ஒழுக்கத்தோடு பொருந்தாத தீச் செயலை உடையராய், ஒக்கலைப் போல்வர் - பிறப்பானும் தோற்றத்தானும் மட்டுமே அவர்க் கினம் போன்றவராய், பலரும் உளர் - பற்பலர் இருப்பர், (எ - று.)


(பாடம்) 1 பாற் படுத். 2 உறையு. 3 ஒக்கிலைப்.