:: TVU ::

பக்கம் : 1226

(இ - ள்.) இன்ன நிலைமை - இத்தன்மையுடைய, இதனுள் - இவ்வில்லறத்துள்ளே, பிறந்தவர் - மனிதராகத் தோன்றியவர், வதத்தாற் பெறுவது ஒன்று உண்டு - விரதங்களாலே பெறுவதற்குரிய உறுதி ஒன்றுளதாம், (அஃதியாதெனில்) பொன் இயல்சேர் கற்ப போக நிலங்களில் - அழகிய இயல்புடைய கற்பம் என்னும் இன்ப உலகங்களிலே, துன்னும் முயற்சி - எய்தும் நன்முயற்சியை, துணியும் திறமே - தெளிந்து செய்யும் தன்மை உடைமையாம் (அது), (எ - று.) அரியதும் இன்பற்றதுமாகிய மக்கட் பிறவியிற் பிறந்தார்க்கு உறுதியுமுளது, அது யாதெனில் போகநிலத்தே பிறத்தற்குரிய முயற்சியைத் துணிதலாம், என்க.
(880)

முயற்சி துணிதிறம்
1991.	துன்னு முயற்சி துணியுந் திறமவை பன்னி யுரைப்பிற் பலவாய்ப் பெருகினும் தன்னிய றானந் தவமொடு பூசனை என்னுமிந் நான்கென வெண்ணி யுணர்நீ.
(இ - ள்.) துன்னும் முயற்சி துணியும் திறம் அவை - கற்ப உலகங்களிலே செல்லுதற்குரிய நற்செயல்களைத் தெளிந்து கொள்ளும் முறைகளை, பன்னி உரைப்பில் - ஆராய்ந்து கூறின், பலவாயப் பெருகினும் - பலபட விரியுமாயினும். (சுருங்கக்கூறுமிடத்தே), தன் இயல் தானம் தவமொடு பூசனை என்னும் - தானமும் தவமும் பூசனையும் தன்னியலும் என்று கூறப்படுகின்ற, இந்நான்கு என - இந்த நான்கு முயற்சிகளுமே என்று, எண்ணி உணர்நீ - நீ ஆராய்ந்து அறிவாயாக, (எ - று.) தன்னியல் - உயிரின் இயல்பாகிய, சீலம்; தானம் சீலம் தவம் பூசனை என எண்ணுவதே முறையாயினும், செய்யுளாகலின் அம்முறை பிறழ்ந்து தன்னியல் முன்னர் வைக்கப்பட்டது. “நற்றானம் சீலம் நடுங்காத்தவம் அறிவர் சிறப்பு இந்நான்கும் மற்றாங்குச் சொன்ன மனைவியர்Ó என்றார் சிந்தாமணியிலும்.
(881)

தானத்தினியல்பு
1992.	தலையு மிடையுங் ¹கடையுமாச் சாற்றும் நிலைமைய தான நிழன்மணிப் பூணோய் ²உலைவிலேற் போனுட னீபவ னீயும் மலைவில் பொருளின்ன மாட்சிய மன்னா.


(பாடம்) 1 கடையுமென விந்நிலைமை. 2 உலைவில னேற்பவர்க் கீயும்பாணிய.