:: TVU ::

பக்கம் : 1232

விரதத்தின் வகை
2001.	மிக்க விரதம் ¹விரிபல வாயினும் தொக்கன ²வைந்திற் சொலுமூன்றி னான்கினில் ஒக்க வவற்றி ³னுறுபயஞ் ⁴சொல்லிடில் தக்கவர்க் ⁵கொத்ததிற் றன்னங் குறைவே.
(இ - ள்.) மிக்க விரதம் விரிபல ஆயினும்- பயன்மிகுந்த விரதங்களை விரித்துக் கூறுமிடத்தே பற்பலவாக விரியும் ஆயினும், சொலும் ஐந்தில் மூன்றில் நான்கில் தொக்கன - சொல்லப்பட்ட ஐந்து விரதங்கள் என்றும் மூன்று விரதங்கள் என்றும் நான்கு விரதங்கள் என்றும் அவை தொகுக்கப்பட்டுள்ளன, ஒக்க அவற்றின் உறுபயன் சொல்லிடில் - அவையிற்றால் பொருந்தும் பயனையும் உடன் கூறின், தக்க அவர்க்கு ஒத்து - ஐந்தும் நான்கும் மூன்றுமாகிய இவைகளை ஏற்றுக்கொள்ளும் தகுதியுடையார் தன்மைக்குப் பொருந்தி, அதில் - அப்பயனானும், தன்னம் - சிறிது, குறைவே - குறைவுடையனவாம், (எ - று.) இல்லறத்தார்க்குரிய விரதங்கள்:- அணுவிரதம், குணவிரதம், சிக்கை விரதம் என முத்திறப்படும். அவற்றுள், அணுவிரதம்:- ஐந்து வகைப்படும். அவையாவன:- இன்னா செய்யாமை, வாய்மை, வெஃகாமை, பிறன்மனை பேணாமை, வரையறையுடைமை என்பன. குணவிரதம்:- திக்குவிரதம் அநர்த்ததண்ட விரதம் போகோப போகபரிமாணம் என மூன்று வகைப்படும். சிக்கைவிரதம்:- தேசாவகாசிகம், சாமாயிகம், புரோடதோபவாசம், அதிதி பூசை என நால்வகைப்டும், இவற்றின் உட்பிரிவுகளை விரிப்பிற் பெருகும், விரிந்த நூல்களுட் காண்க.
(891)

கொல்லா விரதத்தின் சிறப்பு
2002.	எல்லா விரத மியல்பொக்கு மாயினும் அல்லா விரத மனையா ⁶யவர்கட்குக் கொல்லா விரதங் குடைமன்ன ⁷வாமெனின் வெல்லா வகையில்லை வீங்கெழிற் றோளாய்.
(இ - ள்.) எல்லா விரதம் இயல்பு ஒக்குமாயினும் - இவ்வாறு கூறப்பட்ட விரதங்கள் எல்லாம் நன்மையளிப்பதில் ஒத்த தன்மையுடையவே ஆயினும், விரதம் அல்லா - விரதங்கள் அனைத்தையும் ஒருங்காற்றும் ஆற்றல் இல்லாத, மனையாயவர்கட்கு - இல்லறத்தார்க்கும், வீங்கெழிற்றோளாய் குடை மன்ன! - பருத்த அழகிய தோளை யுடையவனான வெண்குண்டைவேந்தனே, கொல்லாவிரதம் ஆம் எனின் - கொல்லாமை என்னும் விரதம் ஒன்றையேனும் குறிக்கொண்டு மேற்கோடல் ஆகுமாயின், வெல்லா வகையில்லை - அவ்வில்லறத்தார் வென்றொழிக்க வியலாத தீவினை வேறு பிற இல்லை, (எ - று.)


(பாடம்) 1 வடிவுபல. வரிபல. 2 ஐந்தினும் மூன்றினும் நான்கினும். 3 னுறுபயன். 4 சொல்லினும். 5 கோதத்த. 6 லவர்கட்கு. 7 வாமேனின்.