:: TVU ::

பக்கம் : 1261

	பணியினமைத் திடல்குறிப்பிற் பலவுருவு நனிகோடல் துணிவமையு நெடுவேலோய் சுடருடைய குணங்களே.
(இ - ள்.) அணுவளவாய்ச் சிறுகுதல் - ஒரு சிறிய துகள் அளவிற்றாய்த் தன்னுருவத்தைச் சுருக்குதலும், மற்று, அதிநுட்பம் - அவ் வணுவிலும் சிறிய உருக்கோடலும், மிகப்பெருகல் - அண்டமத்துணைத் தம்முருவைப் பெருகச் செய்தலும், நினைத்துழியே - தம்மை நினைப்போர் நினைத்தபொழுதே, நணியவர்போல் - அவர்தம் அண்மையிலிருந்தாரைப் போன்று, நண்ணுறுதல் - அவர்பால் எய்துதல், விழைதகைமை பணியின் அமைத்திடல் - தாம் விரும்பும் தகுதியுடைய பொருள்களை நினைப்பு மாத்திரையானே செய்தமைத்துக் கோடல், குறிப்பிற் பலவுருவும் நனிகோடல் - பல்வேறு வடிவங்களை நினைத்த பொழுதே விரைந்து கொள்ளுதல், துணிவு அமையும் நெடு வேலோய் - அஞ்சாமை எய்துதற்குக் காரணமான நீண்ட வேலையுடைய அரசனே, சுரருடைய குணங்களே - இவையெல்லாம் தேவர்க்கு அமைந்த பண்புகளாம், (எ - று.) தேவர்கள் அணுவளவாகச் சுருங்குதல் பெருகல் நினைத்துழி நண்ணுதல் விரும்பியவற்றை இயற்றல் பற்பல உருவங்கோடல் முதலிய குணங்களுடையர் என்க.
(946)

2057.	அளிதருஞ்செங் ¹கோலுடையோ யமரருக்கு மந்தரமுண் டொளியோடு பேரின்ப முயர்ந்தவர்க்கே யுயர்ந்துளவாம் தெளிதருநற் ²காட்சியது திருந்தியமே னெடுந்தகையோர்க் ³கெளிதகவும் பெரும்பாலும் பெறலேனோர்க் கரியவே.
(இ - ள்.) அளிதரும் செங்கோல் உடையாய் - உலகை ஓம்புதல் செய்யும் செங்கோன்மை உடைய வேந்தனே, அமரருக்கும் - அவ் வமரர்களுக்கும், அந்தரமுண்டு - வேற்றுமை உண்டு, உயர்ந்தவர்க்கே - இவ்வுலகிற் போன்று ஆண்டும், தவப் பயனால் உயர்ந்த தேவர்களுக்கு மட்டுமே, ஒளியோடு பேரின்பம் உயர்ந்துளவாம் - புகழ்ச்சியுடனே இன்பப் பேறும் சிறப்பாக உள்ளன, தெளிதரு நற்காட்சியது - நன்ஞானத்தின் வழியதாகிய நற்காட்சியும், திருந்திய - திருத்தமுறப் பெற்ற, மேல் நெடுந்தகையோர்க்கு - உயரிய பெருந்தகைமையுடையவர்கட்கே, பெறல் - அவ்வின்ப முதலியவற்றை எய்துதல், எளிதாகவும் - எளிமையாய் இயல்வதூஉம் ஆகும், பெரும்பாலும் ஏனோர்க்கு அரிய பெரும்பான்மையும் அத்தகையோர் அல்லாத அமரர்கள் அவற்றை எய்துதல் அரிதே ஆகும், (எ - று.)


(பாடம்) 1கோலோய். 2காட்சிதிருந். 3எளிதகவை.