(இ - ள்.) இன்பமே பெரிதாகி - இன்ப நுகர்ச்சியே மிக்கு, இடையறவு இன்றி -
அவ்வின்ப நுகர்ச்சிதானும் இடையறவு படாமல், இமைப்பளவும் - தம்மிமைகள் இமைத்திடும்
நாள்வரை, துன்பம் ஒன்று இல்லாத - துன்ப நுகர்ச்சி ஒரு சிறிதும் இல்லாததாகிய,
துறக்கத்திற் பெருஞ்செல்வம் - துறக்க நாட்டில் எய்திய பெரிய செல்வப்பேறு, மன் பெருந்
தவத்தினால் வரும் - உயிர்கட்கு நிலைத்த தவப்பயனாக வருவதாம், ஒரு நாள் ஈறுடையது
- அப்பேறு தானும் ஒருநாள் முடிவுடையது, என்று அடிகள் தரு பொருள் தெளிந்தார் -
என்று அருகபரமன் அருளிய பரமாகமத்தின் உட்பொருளினை நன்கு ஆராய்ந்து தெளிந்த
சான்றோர், அன்பு அதன் மிசையே - அந்நிலைபேறில்லாத இன்பத்தின்பால் அவா விலர்,
(எ - று.)

     இலர் என்றொரு சொல் வருவித்துக்கொள்க. தேவராய்ப் பிறந்தோர் தம் அறப்பயன்
தீர்ந்துழித் தம் கண் இமைக்கப் பெறுவர் என்றும் அக்கண்ணிமைத்தல் தொடங்கி
அளவிலாத் துயரின் மூழ்கிச் சின்னாளில் இறப்பர் என்றும் கூறுப ஆகலின், “இமைப்பளவும்
துன்பம் ஒன்று இல்லாத“ என்றார், ஒருமாத்திரைப்போதும் எனினும் பொருந்தும்.

     அத்துணைச் சிறப்புடைய அமரர் வாழ்க்கையும் அழியுமியல்புடை யதேயன்றி நிலைத்த
தன்மையுடையதன்றென்க.