:: TVU ::

பக்கம் : 152

என்று கூறியருளுதலும், ஏசு இடை இலாதவன் - குற்றமில்லாதவனான அரசன்; தூசுடை மணிக்கலை மகளிர் சூழ்தர - அரையிலுடுத்த வுடையைச் சூழ்ந்ததான மணிகள் பதித்துச் செய்யப்பட்ட மேகலையை உடைய தன்மனைவியர் தன்னைச் சூழ்ந்திருக்க; இருக்கை எய்தினான் - தான் அமர்ந்திருக்கலானான், (எ - று.) முனிவர்கள் அரசனுக்கு வாழ்த்துரை கூறி இருக்குமாறு பணித்தார்கள். பெண்கள் தன்னைச் சூழ்ந்திருக்க அரசன் அமர்ந்தனன். இருக்கவியங்கோள். “இருக்கை யெய்தினான்“ அரசன் தான் அமர்ந்திருக்கத் தக்க இடத்தை யடைந்து அமர்ந்தான். பாசிடை - பசுமை இடை; பண்புப் பகுதி ஈறுபோய் ஆதிநீண்டது. ஆசிடை கொடுத்து - ஆசீர்வதித்து, ஏசு இடை இலாதவன் - பழித்தற்கு இடமில்லாதவன். ஈற்றடி முற்றும் மோனையாக அமைந்துள்ளது.
( 76 )
வேறு வரிப்பாட்டு முனிவர்கள் அரசன் நலத்தை வினாவ அரசன் வணங்குதல்
195.	தாளுயர் தாமரைத் திருவுந் தண்கதிர் நீளெழி லாரமு நிழன்ற கண்குலாம் தோளிணை செவ்வியோ ¹வென்னச் சூழொளி வாளவன் மணிமுடி வணங்கி வாழ்த்தினான்.
(இ - ள்.) தாளுயர் தாமரைத் திருவும் - தண்டினால் உயர்ந்த செந்தாமரை மலரில் வாழ்கின்ற திருமகளும், தண்கதிர் நீள்எழில் ஆரமும் - குளிர்ந்த ஒளிகளையுடைய திங்கள்போல விளங்குகின்ற அழகிய முத்துமாலையும், நிழன்ற - தங்கிவிளங்கப்பெற்ற; கண்குலாம் தோள்இணை - காண்போரின்கண்கள் மகிழ்தற்குக் காரணமான அழகிய உன்தோள்கள் இரண்டும், செவ்வியோ என்ன - நன்மையாக இருக்கின்றனவோவென்று கேட்க, சூழ்ஒளிவாளவன் - சுற்றிலும் ஒளிவீசுகின்ற வாட்படையையுடைய சுவலனசடியரசன், மணிமுடி வணங்கிவாழ்த்தினான் - தனது அழகிய தலையால் வணங்கி முனிவர்களைப் போற்றினான், (எ - று.)


(பாடம்) 1. வென்று.