எனவே, இருபத்துநான்கு தீர்த்தங்கரரும், பன்னிரு சக்கரவர்த்திகளும், ஒன்பது பலதேவரும்,
ஒன்பது வாசுதேவரும். ஒன்பது பிரதிவாசுதேவரும் என்றவாறாயிற்று. பலவர் - பலதேவர்,
கேசவர் - வாசுதேவர், வாசுதேவர் ஒன்பதின்மர்க்கும் பிரதி வாசுதேவர் ஒன்பதின்மரும்
பகைவர் ஆதலின். மாற்றவர் என்றார்.

     (இ - ள்.) மன்னவ - பரதனே! நின்மகன் மரிசி - நின் மகனாகிய மருசி என்பவன்,
மாற்று இடைப்பொன் அவிர் - மாற்றுயர்ந்த சிறந்த பொன்னாலாகிய மாளிகை
விளங்குகின்ற, போதனம் உடைய - போதனமா நகரத்தினை உரிமையாக வுடையவனும்,
பூங்கழல் கொல்நவில் வேலவன் குலத்துள் தோன்றினால் - அழகிய வீரக்கழலை
யணிந்தவனும் கொலைத் தொழிலைத் தோற்றத்தாலே கூறிவிளங்குகின்ற வேற்படையை
யுடையவனுமாகிய அரசனுடைய குலத்திலே பிறந்தால், அன்னவன் - அவன், கேசவர்க்கு
ஆதியாகும் - முதலாவது வாசுதேவன் ஆவான் (எ - று.)

மன்னவ - அண்மைவிளி. மரிசி. மருசி. போதனம் - போதன நகரம். போதனமுடைய வேலவன் என்றது பயாபதி வேந்தனை. கேசவர் - வாசுதேவர்.

    (பாடம்) 1. சொன்னவில். 2. கண்ணி. 3. தேசுறு. 4. செல்வனவ்வுமே.