மருசியானவன் விசயதிவிட்டர்களைப் பன்முறை கண்டும் மன நிறைவு கொள்ளாதவனாய்
உள்ளத்தை ஒருவழிப்படுத்தி அடிமுதல் முடிவரையிலும் மீண்டும் மீண்டும்
நோக்கியவண்ணமே யிருந்தனன் என்க. உடலிலக்கண நூன் முறைப்படி விசயதிவிட்டர்கள்
அமைந்து விளங்கும் சிறப்பு மருசிக்கு, மகிழ்ச்சியளித்த தாதலின் மேன்மேலும்
பார்க்கலாயினான்.

     (இ - ள்.) வேரிமாலை விம்மவும் - தேன்பொருந்திய மலர் மாலை
பருத்துத்தோன்றவும், விளங்குபூண் துளும்பவும் - விளங்குகின்ற அணிகலன்கள் ஒளியை
வெளிப்பரப்பவும், தாரொடு ஆரம்மின்னவும் - பூமாலைகளுடனே முத்துமாலைகள்
விளங்கவும், தயங்குசோதி கண்கொள - விசயதிவிட்டர்களிடத்தில் விளங்குகின்ற ஒளி
கண்களைப் பறிக்கவும், ஆரநோக்க கில்லன் - பொருந்தப்பார்க்க முடியாதவனாகி,
அன்னன் - அத் தன்மையினையடைந்தவன். அரச நம்பிமார்களைச்சார - அரசனுடைய
சிறந்த மக்களாகிய விசயதிவிட்டர்களை நெருங்கி, ஓர் கல்தலத்து இருந்து விளம்பினான் -
ஒருகல்லின்மீது அமர்ந்து சொல்லலானான், (எ - று.)

விசயதிவிட்டர்களின் உடலொளி கண்களைப் பறித்தலால் விஞ்சையன் மனநிறைவு
உண்டாகுமளவும் பார்க்கமுடியாதவனாய் உரையாடத் தொடங்குகின்றனன் என்க.
 

(பாடம்) 1. ஆரநோக்கு கல்லலனரசநம்பி. 2. உண் மறைத்து. 3. இறைஞ்சுவர்.