:: TVU ::

பக்கம் : 38

காணப்படுதலாலும்; மாடம்-நகரத்திலே உயர்ந்து விளங்கும் வீடுகள்; மலையொடு இகலின - மலைகளோடு மாறுபட்டுத் தோன்றின. (எ - று.) மாடங்களுக்கும் மகளிர் கூந்தலுக்கும் கொங்கைகட்கும் ஆடைகட்கும் மணமூட்டுதற்கிடப்பட்ட அகிற்புகை என்க. புகைத்திரள்-முகிலுக்குவமை. முழவின் முரற்சி அம்முகின் மூழக்கத்திற்குவமை. துகிலிகை - எழுதுகோல். கொடியனார் என்றது ஈண்டு உவமங்குறியாமல் வாளா மகளிர் என்னும் பெயர் மாத்திரையாய் நின்றது. அம்மகளிர் - முகிலிடைத் தோன்றி மறையும் மின்னலுக்குவமை.
( 6 )
மாடங்களின் சிறப்பு
42.	¹கண்ணெலாங் கவர்வன கனக கூடமும் வெண்ணிலாச் சொரிவன வெள்ளி வேயுளும் தண்ணிலாத் தவழ்மணித் தலமுஞ் சார்ந்தரோ மண்ணினா லியன்றில மதலை மாடமே.
(இ - ள்.) கண்எலாம் கவர்வன கனக கூடமும் - நோக்குகின்றவர் களுடைய கண்களையெல்லாம் தம் அழகினால் தம்மிடம் இழுப்பனவான பொன்னினாலாகிய கூடங்களும்; வெள்நிலா சொரிவன வெள்ளி வேயுளும் - வெண்மையான திங்கள் ஒளியைப்போன்ற ஒளியை வீசுவனவாகிய வெள்ளியினாலாகிய கூரையும்; தண்நிலா தவழ் - குளிர்ந்த திங்கள் ஒளியை; பரப்பும் மணி - திங்கள் ஒளிக்கற்கள் பதிக்கப்பட்ட; தலமும் - தரையிடங் களும்; சார்ந்து - பொருந்தி; மதலை மாடம் - கொடுங்கைகளையுடைய மாளிகைகள்; மண்ணினால் இயன்றில - (இங்ஙனம் பொன் முதலியவற்றால் இயற்றப்பட்டிருந்தனவேயன்றி) மண்ணினால் இயற்றப்பெற்றில. (எ - று.) கனக கூடம்-பொன்னாலாகிய மன்றம். இதனைப் பொன்னம்பலம் என்ப. வெள்ளி வேயுள் என்றது வெள்ளியால் வேயப்பட்ட கூரையினை. தண்ணிலாத் தவழ்மணி என்றது சந்திரகாந்தக் கல்லினை. மதலை மாடம் பொன் முதலியவற்றால் இயன்றனவே அந்நகரத்துள்ளன; மண்ணால் இயன்ற மாடங்கள் அங்கில்லை என அந்நகரச் செல்வ மிகுதி தெரித்தோதியவாறாம்.
( 7 )

(பாடம்) 1. கண்ணிலாக் கவர்வன.