தேவர்களுடைய இன்பவாழ்க்கைச் செல்வம் தனக்கு இந்த நிலவுலகத்தில் வேண்டும் என்று
தெரியப்படுத்திக் கொள்ளுகிறான். பாம்புகள் இசைச் சுவையை நன்கு உணரும்
ஆற்றலமைந்தவைகள்; அதற்கு ஏற்ப ஈண்டு, ‘பண்மிசைப்படர்ந்த சிந்தைப் பணதரன்,
என்றார்.

     (இ - ள்.) அங்கு - அப்போது, இச்சை உரைப்பக் கேட்டு - நமிமன்னன்
தன்னுடைய விருப்பத்தைக் கூறுதலைக்கேட்டு, ஆங்கு - உடனே, இமையவர் இயற்கை
எய்தும் - தேவர்களின் தன்மையை அடையவல்ல, விச்சையும் - கலையும், துணையும் -
துணையாற்றலையும், வெள்ளி விலங்கலும் கொடுத்து - வெள்ளி மலையையும் ஈந்து,
வேந்தாய் - அரசனாய், நிச்சமும் - நாடோறும், நிலாக என்று - இவைகள் நினக்கு
விளங்குவதாக என்று வரங்கொடுத்து, நிறுவிப்போய் - நிலையாக வாழுமாறு கூறிச்சென்று,
ஆயிரம் பணத்தினால் - ஆயிரம் படங்களையுடைய ஆதிசேடன், நிலத்தின் கீழ் -
நிலவுலகத்தின் கீழேயுள்ள, தன் அச்சம்இல் உலகம் சேர்ந்தான்- தன்னுடைய அச்சமற்ற
உலகத்தை யடைந்தான், (எ - று.)

ஆதிசேடன், நமி மன்னனுக்கு அவன் வேண்டியவாறாதற்குரிய வித்தை முதலியவைகளை
யளித்துத் தன்னுடைய உலகத்தை யடைந்தனன் என்பதாம். நிலாக - நிலாவுக என்னும்
வினைமுற்றின் விகாரம்.

(பாடம்) 1. இச்சை யாங்கு. 2. கேட்டே. 3. குலத்தினான்.
4. டொப்பாவோங். 5. முடையநீயும். 6. கருமமுந்து. 7. நிலைமைத்து.