(இ - ள்.) மதியினை மலரச்சூழ்ந்து - அறிவை விரிவுறவைத்து ஆராய்ந்து,
வருந்தித்தாம் படைக்கப்பட்ட - மனம்மொழி மெய்களால் தாமே வருந்தி ஈட்டப்பட்ட,
நிதியினை நுகர்தும் என்று நினைத்து இருந்த போழ்தில் - பொருள்களை இனி
அநுபவிப்போம் என்று எண்ணி இருக்கின்ற பொழுதில், பதியினைக் கலக்கிச்சென்று
பறித்துத் தாம் - அங்ஙனம் எண்ணியிருந்தாருடைய உறையுள் முதலியவற்றையும் நிலை
குலையச் செய்துபோய் அவர் வருந்தியீட்டிய நிதிக்குவியல்களையும் பிடுங்கி, பிறர்க்கு
நீட்டும் விதியினை விலக்கமாட்டா - ஏதிலாராய பிறர்பால் கொடுக்கின்ற தீய போகூழை
அகற்ற இயலாத வராய், வெளிய நிரார் மெலிபவால் - பேதையர் வருந்தா நிற்பர்,
(எ - று.)
     மாட்டா : துவ்வீறு தொக்கது, ஆல் : அசை.
ஒருவன் அறிவாலே ஆராய்ந்து உடல் வருந்தி ஈட்டிய பொருளை இனி நுகர்வாம்
என்றிருக்கும்போது பகைவர் புக்கு அவன் உறையுள் முதலியவற்றைக் குலைத்து அவன்
பொருளை ஏதிலார்க்குக் கொடுக்கும் படி செய்வது போகூழே ஆகும். அப்போகூழை
மாற்றலாற்றாது பேதைகள் வருந்தா நிற்பர் என்பதாம்.
 

     (இ - ள்.) ஒளியினால் பெரியன் ஆய ஒருவனுக்கு - புகழுடைமையால் சிறந்த
பெரியோன் ஒருவனை அண்மி அவனுக்கு, உவப்பச்செய்து - மகிழ்ச்சியுண்டாகும்படி
அவன் ஏவியவற்றை நன்குசெய்து, ஓர் அளியினால் வாழ்தும் என்னும் அவாவினுள் -
அவன் நம்பாற்காட்டும் ஓர் அருளாலே யாம் இன்புற்று வாழ்வாம் என்னும் பேராசையினுள்
அழுந்துகின்றாம் - அழுந்தாநின்றோம், நாம் இதனைத் தெளியக்கண்டும் - நாம் இதற்குரிய
காரணத்தை நன்கு தெரிந்துவைத்தும், செய்வினைத் திறங்கள் தன்மைகளை
ஆராய்கின்றோமில்லை, அறிவினாற் சாலப்பெரியமேகாண் - நாம் அறிவுடைமையால்
மிகமிகப் பெரியமே போலும், அளியமோ அளியம் - யாம் மிகவும் அளிக்கத்தக்கவர்களே
ஆகின்றோம், (எ - று.)

     (பாடம்) 1. மெலிபவ ரெளிய நீரார்.