(இ - ள்.) ஆதலால் - அவ்வாறாதலால், அவன் திறத்து யாது செய்யினும் -
அம்மன்னனுக்கு யாம் எத்தகைய உயரிய சிறப்பைச் செய்தாலும், ஏதம் ஆங்கில்லை -
அவ்வழிக் குற்றம் ஏதும் உண்டாதலில்லை, கோல் இறைவ - செங்கோல் மன்னனே !,
என்றனர் - என்று கூறினர் (அவர் எத்தகையர் எனில்), கோதிலாக்குணம் புரிகுன்று
அனாற்கு குற்றமற்ற நற்குணங்களான் இயன்றதொரு மலையையே ஒத்த பயாபதி மன்னற்கு,
ஒரு நீதிநூற் கடலின் நின்றனைய நீர்மையார் - ஒப்பற்றதோர் அரசநீதியென்னும் கடல்
நிலைத்து நின்றிருந்ததை ஒக்கும் தன்மையுடைய அமைச்சர்கள் என்றபடி, (எ - று.)

குணக் குன்றத்தை அறவாழி சூழ்ந்தது என்னும் நயம் உணர்ந்து மகிழ்க. இவ்வாற்றால்
சடிமன்னன் எத்தகைய சிறப்பையும் பெறுதற்குத் தகுதியுடையோனே என்றனர் என்க.
 

     (இ - ள்.) ஆங்கு அவர் மொழியைக் கேட்டே - அவ்விடத்தே அவ்வமைச்சர்தம்
அறிவியல் மொழியைச் செவியுற்ற, வாங்கு இருங் கடல் அந்தானை மன்னவன் - வளைந்த
பெரிய கடல்போன்ற அழகிய படைகட்கு அரசனாகிய பயாபதி, அறிவினுக்கு அரசர் என்று
மகிழ்ந்து - (யாம் வறிய மண்ணிற்கு மட்டும் அரசாக) நீவிரோ அறிவுலகிற்கே அரசர்
ஆவீர்கள் என முகமன் கூறி (அவர் மகிழ) மகிழ்ச்சியை அடைந்து, மற்றைப் பூங்குழை
மகளிர் காக்கும் பொன் அணிவாயில் போகி - அழகிய தோடுடைய மகளிர்களால் காவல்
செய்யப்பட்ட அப்பொன்னால் அழகுறுத்தப்பட்ட வாயிலைக் கடந்து, தேம் கமழ் அலங்கல்
மார்பன் - தேன் கமழ்மாலை அணிந்த மார்பையுடைய அம்மன்னன், திருநகர் -
அரண்மனையின், முற்றம் - தலைவாயிலை, சேர்ந்தான் - எய்தினான்; (எ - று,)

அறிவினுக்கு அரசர் என்றான், யான் உலகிற்கு மட்டுமே மன்னன் நீவிர் அறிவிற் கரசர்
ஆதலார் நீயிரே என்னினும் பெரியீர் என்றவாறு.
 

     (பாடம்) 1. மொழியக் 2. மற்றப். 3. தொடர்கணூன்ற