(இ - ள்.) அருள் அறிந்து உழையர் ஓடி - வேந்தன் கட்டளையிட்டருளியதை
அறிந்த பணியாளர்கள் விரைந்தோடி, அரசுவா வருக என்ன - நம் அரசயானை வருவதாக
என்று அக்கட்டளையை அறிவித்தலும், மருளிவண்டுழலும் தாரை - வண்டுகள்
மயக்கங்கொண்டு உழல்தற்கு ஏதுவாகிய மதநீரைத் தாரையாகப் பொழியும், மழகளிறதனை
-இளமை மிக்க அக்கோக்களிற்றை, மேய்ப்பான் - ஓம்புகின்ற பாகன், இருள் இருங்குன்றம்
ஏய்க்கும் - இருண்ட பெரிய மலையினை ஒக்கும் அவ்வியானையின், இரும்பிணர் எருத்தம்
ஏறி - பெரிய சருச்சரையுடைய பிடரின்கண் ஏறி இருந்து, வெருவரும் மொழியில் தேறி -
அஃதஞ்சுதற்குக் காரணமான யானை மொழியினாலே அதனைத் தெளியச்செய்து, (இனிதே
நடத்துதலின்) மேன் முறைத் தொழிலன் ஆனான் - பாகு நூல் வல்லாருள் சிறந்த
தொழிலையுடையன் ஆயினான், (எ - று.)

     மேன்முறைத் தொழிலன் - யானைமேலிருந்து நடத்தும் தொழிலன் ஆனான்
எனினுமாம். அரசுவா - பட்டத்தியானை. மேய்ப்பான் - யானைப்பாகன்.
 

     (இ - ள்.) அரசுவாவதனோடு ஆடி இயல் அறிந்து அணைந்த பாகன் - அந்த அரச
யானையோடு பெரிதும் ஊடாடி அதனுடைய இயற்கையாகிய குணங்களை நன்கு அறிந்து
அதன்பால் சென்று பயின்றுள்ள அப்பாகன், புரசை நெகிழ்த்து - கழுத்திடு கயிற்றை
அவிழ்த்து, மற்றோர் புதுவடம் புரள வீக்கி - வேறொரு புதியதாகிய கயிற்றைப் புரளுமாறு
கட்டி, உரைசெய்தாற் சுவடு நுங்கச் செறித்து - கூறப்படுகின்ற காற்சுவட்டைக் கவ்வும்படி
பிணித்து, ஒன்று புறத்ததாக்கி - ஒருகாலைத் தளையாது புறத்தே விட்டு, நிலத்தவர்
ஏறுகென்றான் - தரையில் நிற்கும் யானைத் தொழிலாளர்கள் ஏறுக என்று கூறினான், (எ -
று.)

     (பாடம்) 1. யொப்பான். 2. மரும்பிணர், மருப்பினர்.