(இ - ள்.) தேம்மிடை கா - தேன்செறிந்த பொழில்களையுடைய, கானல்வேலி - 
கடற்கரையின்கண் உள்ள, செழுமணற்குவாலும் - மிக்க மணற்குன்றுகளாதல், குன்றும் -
குறிஞ்சியிலுள்ள மலைகளாதல், பூமிடை தடமும் - மருதத்துள்ள பூக்கள் செறிந்த
குளங்களாதல், காவும் - முல்லையிலுள்ள பூம்பொழில்களாதல், காமுடை மனத்தினார்
புக்கவர்க்கு - காமநோய் மிக்க மனத்தையுடையராய் அந்நோய் தணிக்கக்
கருதிச்சென்றார்க்கு, அரணம் ஆகா - அவை அவர்நோய் தீர்த்துக் காக்கும் மருந்துகள்
ஆகமாட்டா, தாம் உடை மனமும் கண்ணும் - மேலும் அந்நோய் கொண்டார்க்கு
அவருடைய மனமும் கண்களும், நிறைவும் - நிறையென்னும் பண்புமே, தம்பால ஆகா -
அவர் பகுதியினின்று அவர் விருப்பப்படி இயங்கமாட்டா எனின், காமுடை மனத்தினார்க்கு
- அக்காமநோய் செறிந்த மனமுடையார்க்கு, யாருளர் களைகண் ஆவார் - பிறர் அவர்
இடுக்கண் களைந்து அவரை உய்யக் கொள்வார் யாரேயுளர், (எ - று.)

“ஊருள் எழுந்த உருகெழு செந்தீக்கு
நீருட் குளித்து முயலாகும் - நீருட்
குளிப்பினும் காமம் சுடுமேகுன் றேறி
ஒளிப்பினும் காமம் சுடும்“ (நாலடி - 90)

என்னும் இச்செய்யுளோடு இதனை ஒப்பிட்டுக் காண்க.
“துன்பத்திற் கியாரே துணையாவார் தாமுடைய
நெஞ்சந் துணையல் வழி“ என்பது குறள் (1299)
 

     (இ - ள்.) அரசகன்னி - சுயம்பிரபை, அனையவள் ஆகிய பொழுதின் -
அத்தன்மையளாய்க் காமநோயால் வருந்தும்பொழுது, இப்பால் - இங்கே, புனைமலர்
அலங்கல் மார்பிற் பூமி அங்கிழவன் தேவி - புனைந்த மலர்மாலையணிந்த மார்பையுடைய
பயாபதி வேந்தனின் மனைவியாகிய சசிதேவி என்பாளால், வனம் மலர் உருவக்கண்ணி -
தண்ணீரிற்றோன்றும் தாமரை மலர் போன்ற அழகுடைய கண்களையுடையவளும்,
மணிவண்ணன் - திவிட்ட நம்பியினுடைய, மார்புதோயும் பூணினாளை - மார்பகத்தே
பொருந்தும் உரிமையுடையவளும் அணிகலன்களை அணிந்தவளுமாகிய சுயம்பிரபையை,
காண்கென விடுக்கப்பட்டார் - சென்று காணுங்கோள் என்று ஏவப்பட்ட மகளிர்கள், (எ -
று.)