(இ - ள்.) வெய்யொளி நிறைந்த நீல விசும்பென்னும் - வெவ்விய ஒளியான் நிறைந்த
நீலநிறமான விண் என்னும், மணிகொள் பொய்கை - அழகிய குளத்தின்கண்ணே,
செய்யொளிச் செக்கர் என்னும் - சிவந்த ஒளியுடைய செக்கர் வானம் என்னும் செம்புனல்
பரந்து தேறி - செவ்விய புதுப்புனல் பரவித் தெளிந்திட, மையிருள் என்னும் சேற்றில் -
அப்பொய்கைக்கண் உள்ள கரிய இருள் ஆகிய சேற்றின்கண்ணே வளர்திங்கட்கதிர்கள்
என்னும் - வளர்தலையுடைய திங்கள் மண்டிலத்தின் சுடர்களாகிய, மொய் இளம் கமல
நாளம் வளையங்கள் முளைத்த அன்றே - செறிந்த இளமையுடைய தாமரையின்
தாள்களையுடைய சுருள்கள் முளைப்பனவாயின அன்றே: அசை, (எ - று.)

தாமரை வளையம் - தாமரை யிலைகளின் சுருண்ட தளிர்கள் - அவை
வெண்ணிறமுடையன வாகலின் நிலாவொளிக் கற்றைக்கு உவமை கூறினார்.
 

     (இ - ள்.) அங்கு ஒளி விசும்பிற்றோன்றி அந்திவான் அகட்டுக்கொண்ட -
அவ்விடத்தே ஒளியுடைய விசும்பின் கண்ணே தோன்றிச் செக்கர் வானத்தின் இடையே
இருத்தலைக் கொண்டுள்ள, அங்குழவித் திங்கள் - அழகிய இளைதாகிய பிறையினது,
பாலவாய் தீம் கதிர்முறுவல நோக்கி - பால்போலும் நிலபுடைய வாயிற்றோன்றும் இனிய
வொளியாகிய புன்முறுவலைக் கண்டு, ஆம்பல் தங்கு ஒளிவிரிந்த - ஆம்பல்மலர்கள்
தம்மிடத்தே தங்கிய ஒளியை விரித்தன, தாமரை குவிந்த - தாமரை மலர்கள் கூம்பின,
ஒருவராய் உலகுக்கெல்லாம் இனிய நீரார் எங்குளர் - ஒருவராக இவ்வுலகம் முழுதிற்கும்
இனிமையே செய்யும் தன்மையுடையார் யாண்டுளர்? (இல்லை என்றபடி.)

ஒரு சாரார்க்கு இனிமை செய்யின் மற்றொரு சாரார்க்கு இன்னலாய் முடிதலின், உலகின்
அனைவருக்கும் இனிமையே செய்தல் யார்க்கும் இயல்வதன்று என்பதாம்.
 

     (பாடம்) 1. ரமிழ்த மாந்தி. 2. எங்குளருலகுக்கெல்லாம். 3. கதிர்களூன்றி