:: TVU ::

பக்கம் : 733

ஆம்: அசை. தானவர் - விஞ்சையர். உவன் - அச்சுவகண்டன். துகள் - தூசி. ஏனவர் என்றது கருடர் கிம்புருடர் முதலிய தேவ வகுப்பினரை.
( 25 )

1156.	இற்றதிவ் வுலக மென்பா ரெரிந்தன திசைக ளென்பார் அற்றன மகர முந்நீ ரகம்புலர்ந் தொழியு மென்பார் மற்றினி மொழியல் வேண்டா வருவன வறிய லாகா உற்றபி ¹னறிது மென்றாங் குரையொழி வாரு மானார்.
(இ - ள்.) இவ்வுலகம் இற்றது என்பார் - இந்த உலகம் முடிவுற்றது என்று அவ்வரசருட் சிலர் கூறுவர், திசைகள் எரிந்தன என்பார் - எட்டுத்திசைகளும் இவன் சினத்தீயால் எரிந்தொழியும் என்று சிலர் கூறுவர், அற்றன மகரமுந்நீர் அகம் புலர்ந்து ஒழியும் என்பார் - நீர் வறந்தனவாகி மகரமீன் வாழும் கடல் உள்ளிடம் காய்ந்தொழியும் என்று சிலர் கூறுவார்கள், மற்றினி மொழியல் வேண்டா - வேறு சிலர் இனி இத்தகைய மொழிகள் பேசுதலை ஒழியுங்கோள். வருவன அறியலாகாமேல் நிகழும் செயல்கள் நம்மால் அறியுந்தரத்தன அல்ல; உற்றபின் அறிதும் - அது யாதாயினும் நிகழ்ந்த பின்னர் அறிந்துகொள்வேம், என்று - என்று கூறி, உரை ஒழிவாரும் ஆனார் - சொல்லவிந்து அமைவார்களும் ஆயினார், (எ - று.) இவ்வுலகம் இறுதி எய்திற் றென்பாரும், கடல்வற்றி ஒழியுமென்பாரும், இனி இன்ன கூறவேண்டா; வருவன அறியலாகா; உற்றபின் அறிதும்; என்பாரும் ஆயினர் என்க.
( 26 )

1157.	அஅச்சமோ டுலக மின்றே யவிந்தன ²பொன்று மென்பார் நச்செரி நகையி னாலே நடுங்கின திசைக ளென்பார் ³இச்சைகள் பிறந்த வாற்றா லினையன நினையும் போழ்திற் கச்சையங் களிநல் யானைக் காவலன் கனன்று சொன்னான்.
(இ - ள்.) உலகம் இன்றே அச்சமோடு அவிந்தன பொன்றும் என்பார் - வேறு சிலர் இவ்வுலகில் வாழும் உயிர்கள் எல்லாம் இப்பொழுதே அச்சத்தாலே உயிர்ப்படங்கி இறந்தொழியும் என்பர், திசைகள் - வேறு சிலர் எட்டுத் திசைகளும், நச்சு எரி நகையினாலே - இவன் சினமாகிய நஞ்சு அளாவிய தீக்காலும் சிரிப்பாலே, நடுங்கின - நடுக்கமடைந்தன, என்பார் - என்று கூறுவர், இச்சைகள் பிறந்தவாற்றால் - இங்ஙனமே அவ்வரசர்கள் தத்தம் விருப்பம் தோன்றிய வழியானே, இனையன நினையும் போழ்தில் - இன்னோரன்னவற்றை நினைக்கும் பொழுது, கச்சையங்களி நல்யானை - கச்சையென்னும் கயிற்றையுடைய அழகிய மதக்களிப்பு மிக்க அரசுவாவினையுடைய, காவலன் கனன்று சொன்னான் - அச்சுவகண்டன் மனம் அழன்று கூறுவானாயினான், (எ - று.)


(பாடம்) 1னொழியு, னறியு. 2 லீன்று. 3 இச்சையள்.