:: TVU ::

பக்கம் : 797


1268.	கடலிரண் டுளவெனிற் ¹கடுக்கு மக்கட லிடைநில முடைமையி ²னென்று மொப்பில வடலரும் படையவை யிரண்டு மவ்வழி யடலரும் படையவை யிரண்டு மொக்குமே.
(இ - ள்.) கடல் இரண்டு உளவெனில் கடுக்கும் - தனித்தனி இரண்டு கடல்கள் உளவாயின் அவை இப்படைகட்கு ஒப்பாம் எனிலோ, அக்கடல் இடைநிலம் உண்மையின் என்னும் ஒப்பில - அக்கடல்கள் தானும் தம்மிடைத் தீவுகள் உடையன வாதலின் சிறிதும் ஒப்பாகமாட்டா, அடல் அரும் படையவை இரண்டும் - வெல்லுதற்கரிய அவ்விரு படையும், அவ்வழி - அவ்வாறிருக்குமாற்றால், அடல் அரும்படையவை இரண்டும் ஒக்கும் - வெல்லற்கரிய அப்படைகள் இரண்டும் தம்முள் ஒன்றனை ஒன்று ஒப்பதாம் என்னலாம், (எ - று.) இரண்டு படைகளும் இரண்டு கடல்களை ஒக்குமெனிலோ அக் கடலிடைத் தீவுகள் உண்மையின் ஒவ்வாவாம், இனி அவற்றிற்கு உவமை தேரின் அவை ஒன்றை ஒன்றொக்கும் எனல் பொருந்தும் என்பதாம்.
( 138 )

1269.	திண்டிறற் றேர்களே செறிந்த வென்னவுங் கொண்டபோர் வேழமே குழீஇய வென்னவும் விண்டவழ் புரவியே மிடைந்த வென்னவுங் கண்டவர் கண்டுழிக் கலந்து தோன்றுமே.
(இ - ள்.) திண்டிறல் தேர்களே செறிந்த என்னவும் - திண்ணிய ஆற்றல் உடைய தேர்களே ஏனையவற்றையும் காட்டில் மிக்கு நெருங்கின என்று கூறுமாறும், கொண்ட போர் வேழமே குழீஇய என்னவும் - போர் மேற்கொண்ட குஞ்சரங்களே மற்றெவற்றினும் மிக்குக்கூடின என்று கூறுமாறும், விண்டவழ் புரவியே மிடைந்த என்னவும் - விசும்பிலே பாய்தலுடைய குதிரைகளே மிக்குக் கூடியுள்ளன என்னுமாறும், கண்டவர் கண்டுழிக் கலந்து தோன்றும் - இவையிற்றுள் ஒவ்வொரு படையையே கண்டவர்க்குக் காணுங்கால் பரவித்தோன்றும், (எ - று.)


(பாடம்) 1 நிகர்க்கு. 2 னென்னு.