(இ - ள்.) குணம் குன்று ஒப்பான் - நல்லியல்புகளில் மலையை ஒப்பவனாகிய
அந்நிமித்திகன்; உற்ற - பொருந்திய; தன் ஒழுக்கிற்கு ஏற்ப - தன்னுடைய
நல்லொழுக்கத்திற்குத் தக்கபடி; உலகு உபசாரம் நீக்கி - உலக நடைக்கேற்பச் செய்யும்
வழிபாடுகளை விலக்கி; கொற்றவன் குறிப்பு நோக்கி - அரசனது குறிப்பைப் பார்த்து;
இருந்தபின் - அரசன்காட்டிய இருக்கையில் அமர்ந்தபின்; முற்றிய உலகில் - நிரம்பிய
உலகத்தில்; மூன்று காலமும் முழுதும் நோக்கி - இறந்தகாலம் நிகழ்காலம் எதிர்காலம்
என்னும் மூன்று காலத்துச் செய்திகளையும் நன்றாகப் பார்த்து; கற்றநூல் புலமை தன்னை -
தான் கற்றுள்ள சோதிட நூலுணர்ச்சித் திறத்தை; காட்டுதல் கருதிச் சொன்னான் -
எல்லோருக்கும் நன்கு புலப்படுத்த நினைத்துச் சில மொழிகளைக் கூறலானான். (எ - று.)

     ஒழுக்கத்தாலுயர்ந்தோர் தமக்குப் பிறர் செய்யும் உபசாரங்களை மறுப்பது இயல்பென்க. குணக்குன்று - நற்குண மலை. மலைக்கு நற் குணங்களாவன; “அளக்கலாகா வளவும் பொருளும், துளக்க லாகா நிலையுந் தோற்றமும், வறப்பினும்வளந்தரும் வண்மையும் மலைக்கே“ என்பவைகளாம். மூன்றுகாலம் : இறப்பு எதிர்வு நிகழ்வு என்பன.

     (பாடம்) 1. வேந்தன்வெண் போது சேர்ந்த.