:: TVU ::

பக்கம் : 875


1401.	மண்ணியன் மன்னர்கை முறுக்கி ¹விட்டிடக் கண்ணியன் யானைமேற் கணையம் பாய்வன திண்ணிய நெடுவரைச் சென்னி மீமிசை விண்ணியல் ²விளங்குமின் விழுவ போன்றவே.
(இ - ள்.) மண் இயல் மன்னர் கைமுறுக்கி விட்டிட - மண்ணை ஆளும் இயல்புடைய அரசர் தம் கைகளால் திரித்து வீசிய, கணையம் - கணையம் என்னும் படை, கண் இயல் யானை மேல் பாய்வன - கண்கட்கு இனிய இயல்புடைய யானைகளின் மேலே பாய்கின்றவை, திண்ணிய நெடுவரைச் சென்னி மீமிசை - திண்மையுடைய நீண்ட மலைகளின் உச்சியிலே, விண்ணியல் விளங்கும் மின் - விண்ணிலே தோன்றுகின்ற விளக்கமுடைய மின்னல்கள், விழுவபோன்றவே - விழுவதை ஒத்தன, (எ - று.) கணையம் - ஒருவகைத் தடி. “யானை யுடையபடை காண்டல் இனிதே“ என்பவாகலின் கண் இயல் யானை என்றார். கண் இயல் - கட்பொறிக்கு இனிய இயல்புடைய என்க. மன்னர் கைமுறுக்கிவிட்ட கணையம் யானைமேற் பாய்வன மலையுச்சியில் மின்னல் வீழ்வதைப் போன்றன என்க.
(271)

1402.	கடுத்துவீழ் கடாக்களிற் றுழவர் தந்தலை அடுத்³தகீ சகந்தமோ டற்று வீழ்வன தொடுத்ததேன் றொடர்ந்த⁴வீப் பிறங்க லோடுடன் உடுத்தமால் வரைமருங் ⁵குருள்வ வொத்தவே.
(இ - ள்.) கடுத்துவீழ் கடாக்களிற்று உழவர்தம் - விரைந்து சொரிகின்ற மதநீரையுடைய யானைமறவருடைய, தலை - தலைகள், அடுத்த கீசகந்தமோடு அற்றுவீழ்வன - தம்மேற் சூட்டிய தலைச்சீராவோடு அறுபட்டு வீழ்கின்றவை, தொடுத்த தேன் - மலைமேல் தொடுக்கப்பட்ட தேனிறால், தொடர்ந்த வீப்பிறங்கலோடு உடன் - தம்மைத் தொடர்ந்து வருகின்ற ஈத்திரளோடே ஒன்றுபட்டு, உடுத்த மால்வரை மருங்கு - பொழில்களை உடுத்துள்ள பெரிய மலையின் பக்கத்தே, உருள்வ ஒத்தவே உருளுமவற்றை ஒத்திருந்தன, (எ - று.) யானை மறவர்களின் தலைகள் கீசகத்தோடு உருள்வன வண்டுக் குழாத்துடன் உருளும் தேனடையைப் போன்று தோன்றின என்க. யானைக்கு மலையும், மறவர்தலைக்குத் தேனடையும், கீசகத்திற்குத் தேனீத்திரளும் உவமைகள். கீசகம் - ஒருவகைத் தலைப்பாகை; தலைச்சீரா என்பதுமிது.
(272)


(பாடம்) 1யிட்டிடக். 2விளங்குமீன். 3திக்கந்தமோ. 4விப்பிறங்க. 5குருவ மொத்தவே.