:: TVU ::

பக்கம் : 896

- முழுத்திங்கள் ஒரு புறத்தே அமையப் பெற்றதாய், வானவில் மருங்குகோலி - மற்றொரு பக்கத்தே இந்திரவில்லை வளைத்துக் கொண்டு, போந்து எழுகின்றது ஒத்தான் - வந்து தோன்றுவதனை ஒத்திருந்தான், (எ-று.) ஒருபுறத்தே வெளிய வலம்புரியினையும், மற்றோரு பக்கத்தே நெடிய வில்லையும் கொண்டு நின்ற நீலநிறமுடைய நம்பி, ஒருபுறத்தே திங்கள் பொருந்த, ஒருபுறத்தே வில்லிட்டுத் திகழாநின்ற பருவமேகம் ஒன்று புதிதாக வந்து தோன்றினாற் போன்று திகழ்ந்தான் என்க. வலம்புரி - பாஞ்சசன்னியம். சிலை - சார்ங்கம்.
(309)

திவிட்டன் உங்கரித்தலும், சண்டவேகை தன்னுருக்கோடலும்
1439.	வலம்புரி சிலம்ப வாய்வைத் திருஞ்சிலை வளைய வேற்றிக் கலம்புரி கனபொன் னாழி கைவிரல் கதிர்ப்பச் சூட்டி உலம்புரி வயிரத் தோளா னுரப்பினா னுரப்ப லோடும் சலம்புரி தெய்வ மஞ்சித் தன்னுரு வடைந்த தன்றே.
இ - ள்.) வலம்புரி சிலம்ப வாய்வைத்து - அவ்வலம் புரிச்சங்கம் முழங்கும்படி தனது திருவாயிலே வைத்து, இருஞ்சிலை வளைய ஏற்றி - பெரிய வில்லை நன்கு வளையும்படி நாண் ஏற்றி, கலம்புரி கனபொன் ஆழி - அணிகலன் செய்யும் கனவிய பொன்னாலாகிய உருட்படையை, கைவிரல் கதிர்ப்பச் சூட்டி - தன் விரல்கள் ஒளி படைக்கும்படி அணிந்து, உலம்புரி வயிரத் தோளான் - திரள்கற் போன்ற திண்ணிய தோளையுடைய திவிட்டநம்பி, உரப்பினான் - உங்கரித்தான், உரப்பலோடும் - உங்கரித்தவுடனே, சலம்புரி தெய்வம் - வஞ்சப்போர் செய்யும் அச் சண்ட வேகை என்னும் தெய்வம், அஞ்சி - அச்சமுற்று, தன் உரு அடைந்தது அன்றே - தன்னுடைய உண்மை உருவத்தை எய்திற்று, அன்று, ஏ : அசைகள், (எ - று.) அவ்வாறு திகழ்ந்த நம்பி வலம்புரியை முழக்கி வில்லை நாணேற்றி ஆழிப்படையை விரல்களிலே செறித்து நின்று, உங்காரஞ் செய்த துணையானே அப்பேய் அஞ்சித் தனது உண்மை உருவினை எய்திற்றென்க.
(309)

சண்டவேகை அஞ்சி மறைதல்
1440.	நிலத்திடை நின்று வான முடியுற நிமிர்ந்து கண்ணின் புலத்தின தளவு நீங்கிப் பொம்மென வுயிர்த்து விம்மிப் பிலத்தின தளவிற் பேழ்வாய் பிறழ்ந்திலங் கெயிற்ற தாகிச் சலத்தினைப் புரிந்த தெய்வந் தலைபனித் துடைந்த தன்றே.