(இ - ள்.) பணங்கொள் நாகம் பலசூழ்ந்து - படத்தையுடைய நாகம் ஆகிய
பவணதேவர்கள் பலர், நினக்கஞ்சி நின்னைச் சூழநின்று, பகல் செய்மணியின் சுடர் ஏந்தி -
பகலைச் செய்கின்ற தங்கள் மணியாகிய விளக்கை ஏந்தினராய், அணங்கி - வருந்தியும்,
அகலாது - நின் ஆணை கடந்து செல்ல அஞ்சி நீங்காதவராய், உழை நிற்கும்
ஆணையுடைய - நின் பக்கத்தே நிற்றற்குக் காரணமான ஆணை ஆற்றலுடைய,
அடல்வேந்தே - வெற்றியையுடைய வேந்தனே, வணங்கி வந்து பல தெய்வம் வழிபாடு
ஆற்றும் - வணக்கத்துடனே நின் குறிப்பின் வழிவந்து நினக்கு இங்ஙனம் பல தெய்வங்கள்
வழிபாடு செய்கின்ற, மறைநேமி - மந்திர மொழியையுடைய சக்கரமாகிய, குணங்கொள்
படையாய் - குணமிக்க படையை ஏந்துபவனே, கூடாரும் நினக்கு உளரோ - நீ
போதற்குரிய பகைவரும் அத்தேவர் உலகில் இன்னும் உனக்கு உளராகின்றனரோ
உரையாய், கோமானே - எங்கள் தலைவனே, (எ - று.)

     பவணதேவராகிய நாகரும் நினக்கு அஞ்சி அகலாது மணிவிளக்கேந்தி நிற்பர், வேறு
பல தேவர்களும் உன்னை வழிபட்டொழுகாநிற்பர், ஆழிப்படையுடைய நினக்குப்
பகையாவார் அத்தேவரில் யாருளர் என்றார் என்க. (உளராயினன்றோ நீ அங்குச்
செல்லவேண்டும் என்றபடி.)