:: TVU ::

பக்கம் : 994

அவ்வாறு நின்னாற் காணப்படும் உருவம் உன்னடைய நிழலன்றிப் பிறிதில்லை என்று நம்பிகூற, விதூடகன், அரசே! என்னிழல் ஆயின் அஃது என்னோடு இயங்குவதன்றி இக் கல்லினுள் புகுமோ! புகுந்தால் பின்னர் அதனை யாம் காணுதல் கூடுமோ! கூடாதாகலின் அது பூதமே! என்றான்; என்க.
(469)

அஃது அவன் நிழலாதலைக் காரணங்காட்டித் தெளித்தல
1600.	நின்னிழ லாவது தெளிய ¹நின்றொழில் ²இந்நிழற் காணென விறைஞ்சி நோக்குபு தன்னிழ றான்செய்வ செய்யத் தான்தெளிந் தின்னிழ லிருந்தன னிலங்கு நூலினான்.
(இ - ள்.) நின்நிழல் ஆவது தெளிய - பார்ப்பன மகனே அவ்வுருவம் உன்னுடைய நிழலே யாம் என்பதை நீ தெரிந்து கொள்ளும் பொருட்டு, நின்றொழில் இந்நிழல்காண் - நீ செய்யும் தொழில்களை இந்நிழலும் செய்வதனை அதனிடத்தே காண்க, என - என்று அரசன் கூற, இறைஞ்சி - விதூடகன் தன் கைகளைக் குவித்து வணங்கியபடி, நோக்குபு - அந்நிழலைக் கூர்ந்து நோக்கி, தன்நிழல் தான்செய்வ செய்ய - தனது நிழலாகிய அவ்வுருவமும் கைகளைக் குவித்து வணங்கித் தான் செய்தவற்றைச் செய்ததாக, தான் தெளிந்து - அவ்வாற்றால் அது தன் நிழலே எனத் தெளிந்தவனாய், இலங்கு நூலினான் - விளங்குகின்ற பூணூலையுடைய அவ்விதூடகன், இன் நிழல் இருந்தனன் - ஆண்டுள்ளதோர் இனிய நீழலின் கண்ணே, அமர்ந்திருந்தான், (எ - று.) திவிட்டன், பார்ப்பனனே! அது நின்னிழல் என்று நீ அறியும் பொருட்டு, அது நீ செய்யும் தொழிலெல்லாம் செய்தலைக் காண்! என, அவனும் அவ்வாறே தான் செய்தொழிலை அது செய்தல் கண்டு, நிழலே என்று தெளிந்து, ஒரு மரநிழலிலே இருந்தான் என்க.
(470)

இருவரும் சிலாதலத்திருத்தல்
1601.	திருந்திய மணிநகைத் தேவி யிவ்வழி வருந்துணைப் பொழுதுமிம் மணிச்சி லாதலம் பொருந்தின ³பொழினலங் காண்டு மென்றரோ ⁴விருந்தன ரிருவரு மினிதி னென்பவே.


(பாடம்) நின்னொடு. 2நின்னிழல். 3 பொழினிலம்.