:: TVU ::

அழல்வேகன் போருக்கு வருதல் வேறு
1326.	பொருதாங் கழிந்து புகைகேது வீழ வரிகேது முன்ன ²முடிய எரிதாங்கு வேலொ டினியீங்கு நின்று பெறுகின்ற தொன்னை ³யெழுகென் ³றரிதாங்க ணாவ தெளிதாகு மாறொ ரமர்செய்கை கொண்டு பிறர்முன் கரிதாங்க ளான கழன்மன்ன ரேறு வருமங்கொர் காளை கடிதே.
(இ - ள்.) பொருது ஆங்கு அழிந்து புகை கேது வீழ - சுவலனரதனோடு போர்செய்து அவ்விடத்தே தோற்றுத் தூமகேது என்பான் மாண்டு வீழவும், முன்னம் - இவன் மாளும் முன்னரே, அரிகேது முடிய - அரிகேதனன் மாளவும், இனி - இனியும், ஈங்கு - இவ்விடத்தே, எரிதாங்கு வேலொடு - ஒளிதங்கிய வேற்படையும் ஏந்தி, நின்று பெறுகின்றது என்னை - நாணமின்றி வாளாநின்று யாம் பெறற்பாலது யாது, எழுகென்று - எல்லீரும் புறப்படும்கோள் என்று, ஆங்கு அரிது ஆவது - அவ்விடத்தே செயற்கரியதாயிருக்கும் போர் ; எளிதாகுமாறு - எளிதாகும்படி, ஓர் அமர்செய்கை கொண்டு - தக்கதொரு சிறந்த போர்ச் செயலை மேற்கொண்டு, பிறர்முன் - பிற வீரர்களுக்கு முன்பு, கரிதாங்கள் ஆன - சிறந்த வீரர்களுக்குச் சான்று தாங்களே ஆகின்ற சிறப்புடைய, கழன் மன்னர் ஏறு - வீரக்கழலையுடைய மன்னர்களுள் சிறந்த ஆண்சிங்கம் போல்வானாகிய, அங்கொர் காளை - அவ்விடத்தே ஓர் இளைஞன், கடிதேவரும் - விரைந்து வருவானாயினன்; (எ - று.) அப்பொழுது, அழல்வேகன் என்னும் விச்சாதரன், “புகைகேதுவும், அரிகேதுவும், மாண்டமை கண்டு யாம் வாளேந்தி வாளா நிற்பதோ எல்லீரும் புறப்படுங்கோள்“ எனக்கூறிப் பகைவரை எளிதில் வெல்லற்குரிய ஒரு போர் முறையை மேற்கொண்டு வருவானாயினன், என்க.
( 196 )