முகப்பு

தொடக்கம்

இதுவுமது 1384. நெய்யினா னிழன்றுநீர் நின்ற நீளொளி வெய்யவா ளமரிடை வெருவி யிட்டதங் கையினாற் கருனையின் கவளங் கொள்ளிய ஐயன்மார் போந்ததென் றசதி 1யாடினான்.      (இ - ள்.) நெய்யினால் நிழன்று நீர் நின்ற நீள்ஒளி வெய்ய வாள் அமரிடை - நெய்பூசுதலாலே விளங்கி மறத்தன்மை நிற்றற்குக் காரணமான தன்மையுடைய நீண்ட ஒளிக்கதிர்காலும் வெவ்விய வாளால் ஆற்றப்படும் போர்த்தொழிலில், வெருவியிட்ட தம் கையினால் - அஞ்சித் தம் படைக்கலன்களை எறிந்துவிட்ட தம்முடைய திருக்கைகளாலே, கருனையின் கவளம் கொள்ளிய - மனைவியர் உவந்தூட்டும் பொரிக்கறியோடு கூடிய உண்டியை ஏந்தி உண்ணவோ, ஐயன்மார் போந்தது - சிறந்த தலைவர்கள் இங்கு வந்தது, என்று அசதியாடினான் - என்றுகூறி இகழ்ந்தான், (எ - று.)      அசதியாடல் - பரிகசித்தல்.      படைத்தலைமை சான்ற பெரியீர்! பகையஞ்சி வாள் முதலியவற்றை விட்டெறிந்த இத்திருக் கைகளால், பொரிக்கறிக்கவளம் நுங்காதலிமார் தர அவற்றை ஏந்தி உண்ணவோ இவ்வாறு நீயிர் ஓடிவருகின்றீர் என்றான் என்க. ஐயன்மார் என்றது இகழ்ச்சி. (254)

மேல்