முகப்பு

தொடக்கம்

தீயிடத்துக்கரியைப்போல மலரிடத்திலே வண்டுகள் காணப்பெறல் 164. அஞ்சுடர் முருக்கி னங்கே ழணிமல ரணிந்து கொம்பர்த் துஞ்சிடை பெறாது தும்பி துவன்றிமேற் றுகைக்குந் தோற்றம் செஞ்சுட ரிலங்குஞ் செந்தீக் கருஞ்சுடர்க் கந்துள் சிந்தி மஞ்சுடை மயங்கு கானம் 2மண்டிய வகையிற் றன்றே.      (இ - ள்.) அம்சுடர் முருக்கின் - அழகிய தளிர்களையுடைய பலாச மரத்தினது; அம் கேழ் அணிமலர் - அழகிய நிறத்தையுடைய சிறந்த மலர்கள்; கொம்பர் - மரக்கிளைகளில்; அணிந்து - வரிசை வரிசையாகத் தோன்றி; துஞ்சு இடை பெறாது தும்பி துவன்றி மேல்துகைக்கும் - தங்குதற்கு இடம் பெறாமையால் வண்டுகள் நிறைந்து மேலே தங் கால்களால் துகைக்கப் பெறுகின்ற; தோற்றம் - காட்சியானது; செம்சுடர் இலங்கும் செந்தீ - செவ் வொளி விளங்கும் நெருப்பானது; கருஞ்சுடர்க் கந்துள் சிந்தி - கருநிறமுள்ள கரிகளைச் சிதறிக் கொண்டு; மஞ்சு உடை மயங்கு கானம் மண்டிய - உயர்ச்சியால் முகில்களைச் சிதறச்செய்கின்ற அடர்ந்த காட்டினிடத்திலே பற்றிய - வகையிற்று - தன்மையைப் போன்றது. (எ - று.) அன்றே: ஈற்றசை.      செந்நிறம் உள்ள பலாச மலர்கள் அம்மரத்தின் கிளைகள் நிறையப் பூத்து மேலே வண்டுகள் மிகுதியாக மொய்க்கப்பெறுகின்ற தோற்றமானது, சிவந்த நெருப்பு, காட்டில்பற்றிக் கரிகளைச் சிதறினாற் போன்றதென்பதாம். பலாசமலர்க்குத் தீயும் வண்டுக்குக் கரியும் வண்ணத்தில் ஒப்பு. இதனை வண்ண உவமம் என்பர். கந்துள் - கரி.   ( 46 )

மேல்