:: TVU ::

1909.	தேனருளி மந்தாரச் செந்தாமந் தாழ்ந்து திரளரைய செம்பவளம் வம்பாக வூன்றி வானருளி மாணிக்கச் செங்கதிர்கள் வீசி மதிமருட்டும் வெண்குடையோர் மூன்றுடைய வாமன் ¹யானருள வேண்டியடி ²யிணைபணியும் போழ்து ³இமையவர்கோ னாயிரச்செங் கண்ணினான் வந்து தானருளு மாறென்று ⁴தாள்பணியும் போழ்துந் ⁵தகையொன்ற தேலிறைமை தக்கதே யன்றே.
(இ - ள்.) தேன் அருளி - தேன் துளித்து, மந்தாரச் செந்தாமம் தாழ்ந்து - ஐந்தருபினொன்றாகிய மந்தாரத்தின் மலராற் புனைந்த செவ்விய மாலை தூங்க, திரள் அரைய செம்பவளம் வம்பாக ஊன்றி - திரண்ட அரையினையுடைய பவளத்தாலியன்ற காலைப் புதுமைபெற ஊன்றி, வான் மாணிக்கச் செங்கதிர்கள் வீசி அருளி - விசும்பின்கண் மாணிக்க மணியின் செவ்விய ஒளிகளைப் பரப்பி அருளி, மதி மருட்டும் - திங்களை மருளச் செய்யும், வெண் குடை -வெண்மை நிறமமைந்த குடைகள், ஓர் மூன்றுடைய வாமன் - ஒரு மூன்றனை உடையவனாகிய அருகக் கடவுள், யான் அருள வேண்டி அடியிணை பணியும் போழ்தும் - மனிதனாகிய யான் அவன் அருளுதலைக்குறித்துத் திருவடிகளை வணங்குமிடத்தும், இமையவர் கோன் - தேவேந்திரன் என்னும், ஆயிரச் செங்கண்ணினான் வந்து -ஆயிரங் கண்களையுடைய தேவன் இவண் வந்து, தான் அருளும் ஆறு என்று - தான் அருளப்படும் வழி இது வென்று கருதி, தாள் பணியும் போழ்தும் - தன் திருவடிகளில் வீழ்ந்து வணங்குமிடத்தும், தகை ஒன்றதேல் - இவ் விரண்டிடத்தும் உளதாம் தன்மை ஒன்றே ஆகும் என்னில், இறையை தக்கதே அன்றே - அக்கடவுளின் தலைமைத் தன்மை தகுதியுடையதே ஆயிற்று, (எ - று)
(799)