:: TVU ::

1910.	விண்டாங்கு ⁶வெவ்வினை வெரூஉவுதிர நூறி விரிகின்ற ⁷மெய்ஞ்ஞானச் சுடர்விளக்கு மாட்டிக் கண்டார்க ணின்னிலைமை ⁸கண்டொழுக யானின் கதிர்மயங்கு சோதியாற் கண்விளக்கப் பட்டுத் தண்டாஅ மரைமலரின் மேனடந்தா யென்றுந் ⁹தமனீயப் பொன்னணையின் மேலமர்ந்தா யென்றும் வண்டார சோகினிழல் வாயமர்ந்தா யென்றும் வாழ்த்தினால் வாராயோ வானவர்தங் கோவே.
(இ - ள்.) வெவ்வினை - பிறவிக்குக் காரணமான வெவ்விய வினைகள், வெரூஉ - தம்பால் நிற்றலை அஞ்சி, விண்டு - வேறுபட்டு, உதிர - உதிர்ந்துபோகும்படி, நூறி - தம் தவவொழுக்கத்தாலே நீறுபடுத்தி, விரிகின்ற மெய்ஞ்ஞானச் சுடர்விளக்கும் மாட்டி - விரிதலையுடைய மெய்யறிவென்னும் ஒளிமிக்க விளக்கையும் தன்னுள்ளே கொளீஇ, கண்டார்கள் - உன்னைக் காணாநின்ற சான்றோர்கள், நின் நிலைமை கண்டு ஒழுக - உனது தன்மையை உள்ளவாறு கண்டு அதற்கேற்றவாற்றான் ஒழுகுவாராக, யான் - எளியனாகிய யானோ, நின்கதிர் மயங்கு சோதியால் - உன்னுடைய கதிரவன் மயங்குதற்குக் காரணமான ஒளியுடைமையானே, கண் விளக்கப்பட்டு - கண்கள் விளக்கமடையப்பெற்று, தண் தாஅமரை மலர்மேல் - குளிர்ந்த தாமரை மலரிடத்தே, நடந்தாய் என்றும் - நடந்தருளியவனே என்று கூறியும், தமனீயம் பொன் அணையின்மேல் அமர்ந்தாய் என்றும் - தமனியம் என்னும் பொன்னாலியன்ற திரு அணையின் மேல் எழுந்தருளியவனே என்று கூறியும், வண்டு ஆர் அசோகின் நிழல்வாய் அமர்ந்தாய் என்றும் - வண்டுகள் மொய்க்கும் அசோக மரத்தினது நிழலின் கண்ணே வீற்றிருந்தருள்பவனே என்று கூறியும், வாழ்த்தினால், யானறியளவையின் ஏத்தித்தொழுதால், வானவர் தம் கோவே - தேவ தேவனே, வாராயோ - வந்தருள மாட்டாயோ, வந்தருள்வாயோ யான் அறிகிலேன், (எ - று)
(800)