:: TVU ::

1911.	¹கருவார்ந்த பொருணிகழ்வுங் காலங்கண் மூன்றுங் கடையிலா ²நன்ஞானக் கதிரகத்த வாகி ³ஒருவாதிங் கவ்வொளியின் னுள்ள வாகில் ⁴உலகெல்லா நின்னுளத்தே யொளிக்க வேண்டா ⁵திருவார்ந்த தண்மார்ப தேவாதி தேவ திரளரைய ⁶செந்தளிர சோகமர்ந்த செல்வ வருவாரும் வையகமு நீயும்வே றாகி மணிமேனி மாலே மயக்குவதிங் கென்னோ.
(இ - ள்.) கருஆர்ந்த பொருள் நிகழ்வும் - உலகந்தோன்றுதற்குக் கருவாகப் பொருந்திய புற்கல முதலிய பொருள்களின் நிகழ்ச்சியும், காலங்கள் மூன்றும் - இந்நிகழ்ச்சிக்குக் காரணமான இறப்பு நிகழ்வு எதிர்வென்னும் மூவகைக் காலங்களும், கடையிலா நன்ஞானக் கதிர் அகத்தவாகி -உன்னுடைய இறுதியில்லாத மெய்யறிவின் ஒளியின் ஊடே உள்ளனவாய், ஒருவாது -மேலும் அவ்வறிவினின்றும் அகலாமல், அவ்வொளியின் உள்ள ஆகில் - அவ்வறிவொளியின்கண் யாண்டும் உள்ளனவானால், உலகெலாம் நின்னுளத்தே - எல்லாவுலகமும் உன்னகத்தனவே, ஒளிக்க வேண்டா - இவ்வுண்மையை எளியேங்கட்கு மறைத்தருள வேண்டா, திருவார்ந்த தண் மார்ப! - திருமகள் பொருந்திய குளிர்ந்த மார்பையுடையோனே!, தேவாதி தேவ - தேவர்கட்குந் தேவனே!, திரள் அரைய செந்தளிர் அசோகு அமர்ந்த செல்வ - திரண்ட அடிப்பாகத்தையுடையதும் செவ்விய தளிர் உடையதுமாகிய அசோகமரத்தின் நிழலிலே இருந்த செல்வனாகிய அருகனே!, வருவாரும் - பிறவிகளிலே சுழன்று வருகின்ற உயிர்களும், வையகமும் - அவை பிறத்தற்கிடமான உலகங்களும், நீயும் - இறையாகிய நீயும், வேறாகி - வெவ்வேறாகத் தோன்றி, மணிமேனி மாலே - நீல மணிபோன்ற நிறமுடைய திருமாலே, மயக்குவது இங்கு என்னோ - இவ்விடத்தே எளியேங்களை மயங்கச் செய்வது எதனைக் குறித்தோ, அறிகின்றிலோம், (எ - று.)