(இ - ள்.) மண்ணியல் வளாகம் காக்கும் மன்னவர் - மண்திணிந்த இந்
நிலவுலகத்தைப் புரக்கும் அரசரானவர்கள். வணக்கலாகாப் புண்ணியநீர ரேனும் -
எவராலும் வளையச் செய்தற்கு அரிய நல்வினையை உடையவர்களாயினும், புலவராற்
புகலப்பட்ட - நுண்மாண் நுழைபுல மிக்க அறிஞர்களாற் கூறப்பெற்ற, நுண்ணிய நூலின்
அன்றி - நுட்பமான பொருளையுடைய அறநூல்களால் அல்லாமல், நுழைபொருள்
உணர்தல் தேற்றார் - தாம் மேற்கொள்ளவேண்டிய செயல்களை நன்குணர மாட்டார்கள்,
எண்ணிய - உள்ளத்தின்கண் நினைத்த செயல்களை, துணிந்து செய்யும் சூழ்ச்சியும் இல்லை
- உறுதியாக நிலைபெறச் செய்யும் அறிவுத்திறமும் அவர்கட்கு உண்டாக மாட்டாது
(எ - று.) அன்றே : அசை.

அரசர்கள் எத்தகையோரையும் வணங்கார். அவர்களை வணங்கச் செய்தலும் அரிது.
ஆயினும் அவர்கள் அறிஞராற் செய்யப்பட்ட அற நூல்களைப் படித்தறிந்தாலல்லாமல்
செய்யவேண்டிய செயல்களையும் விலக்கவேண்டிய செயல்களையும் அறியமாட்டார்கள்.